بايقاۋعا جوعارى وقۋ ورىندارىنىڭ شتاتتاعى وقىتۋشىلارى قاتىسا الادى
«جوعارى وقۋ ورنىنىڭ ۇزدىك وقىتۋشىسى-2022» اتتى رەسپۋبليكالىق بايقاۋ وتەدى، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
قۇجاتتار 1-15 قاراشا ارالىعىندا قابىلدانادى. كونكۋرس جەڭىمپازىنا 6 ميلليون تەڭگەدەن استام سىياقى بەرىلەدى.
بايقاۋدىڭ ماقساتى – وقىتۋشى ماماندىعىنىڭ بەدەلىن ارتتىرۋ جانە جوعارى وقۋ ورىندارى وقىتۋشىلارىن كاسىبي تۇرعىدا ودان ءارى دامۋعا ىنتالاندىرۋ.
بايقاۋعا جوعارى وقۋ ورىندارىنىڭ شتاتتاعى وقىتۋشىلارى قاتىسا الادى. ولاردىڭ ۇزدىكسىز عىلىمي-پەداگوگيكالىق ءوتىلى (كەمىندە 5 جىل)، وقىتۋشىلىق جانە عىلىمي قىزمەتتە جوعارى جەتىستىكتەرى بولۋى ءتيىس. وتىنىمدەر مەن قۇجاتتار اقپاراتتىق جۇيە ارقىلى ەلەكتروندىق فورماتتا قابىلدانادى.
كونكۋرس 2 كەزەڭنەن تۇرادى. اتاپ ايتساق، الدىمەن جوعارى وقۋ ورنىنىڭ ىشىندە، كەيىن رەسپۋبليكالىق دەڭگەيدە وتەدى.
«جوعارى وقۋ ورىندارىنىڭ قىزمەتكەرلەرى مەن پروفەسسورلىق-وقىتۋشىلار قۇرامىنان تۇراتىن ساراپشىلار توبى ۇمىتكەردىڭ ساندىق جانە ساپالىق كورسەتكىشتەرىن ەكى باعىت – وقىتۋ ساپاسى جانە عىلىمي-زەرتتەۋ قىزمەتى بويىنشا باعالايدى. ساراپتاۋ توبىنىڭ قورىتىندىسى نەگىزىندە جوو كوميسسياسى كونكۋرسقا قاتىسۋشىلاردىڭ ەكىنشى رەسپۋبليكالىق كەزەڭگە قاتىسۋى تۋرالى شەشىم شىعارادى. رەسپۋبليكالىق دەڭگەيدە قۇرىلعان كوميسسيا قۇرامىنا ۇكىمەتتىك ەمەس ۇيىمدار، ب ا ق، ستۋدەنتتىك جانە جاستار ۇيىمدارىنىڭ، جوو قاۋىمداستىقتارىنىڭ وكىلدەرى مەن ساراپشىلار ەنگىزىلدى»، - دەپ حابارلادى عىلىم جانە جوعارى ءبىلىم ۆيسە-مينيسترى قۋانىش ەرعالييەۆ.
ايتا كەتەيىك، «جوعارى وقۋ ورنىنىڭ ۇزدىك وقىتۋشىسى» بايقاۋىنىڭ جەڭىمپازدارى اقشالاي ىنتالاندىرۋمەن قاتار، توسبەلگىگە دە يە بولادى.