الماتىدا جۋرناليستەر اراسىندا ءدىن تاقىرىبىنداعى ەڭ وزەكتى دەگەن ماتەريالدارعا بايقاۋ جاريالاندى. ءدىن ىستەرى جونىندەگى باسقارمانىڭ تاپسىرىسى بويىنشا «JASTAR» دامىتۋ ورتالىعى» جاستار قوعامدىق بىرلەستىگىنىڭ ۇيىمداستىرۋىمەن «بىرنەشە نوميناسيا بويىنشا ءدىن سالاسىنىڭ وزەكتى ماسەلەلەرى تۋرالى ۇزدىك ماتەريالداردى دايىنداۋ بايقاۋى» بويىنشا باسپا ءسوز كونفەرەنسياسى ءوتتى. ارنايى ۇيىمداستىرىلعان ءىس-شارادا ۇيىمداستىرۋشىلار بايقاۋدىڭ شارتتارى مەن تالاپتارى تۋرالى تولىق اقپارات بەردى.
بەسىنشى جىل قاتارىنان وتكىزىلىپ وتىرعان مۇنداي بايقاۋعا الماتىدا ءدىن تاقىرىبىن قوزعاپ جۇرگەن جۋرناليستەر، بلوگەرلەر، 18 جاسقا دەيىنگى باسقا دا ۇمىتكەرلەر قاتىسا الادى.
الماتى قالالىق ءدىن ىستەرى باسقارماسىنىڭ ءدىني بىرلەستىكتەرمەن جۇمىس ءبولىمىنىڭ جەتەكشىسى باعداۋلەت ءابدىحاميتوۆتىڭ ايتۋىنشا، بايقاۋدىڭ نەگىزگى ماقساتى – ءدىن سالاسىنداعى مەملەكەتتىك ساياساتتىڭ وزەكتى ماسەلەلەرىنە جۇرتشىلىقتىڭ نازارىن اۋدارۋ. ول ءۇشىن بۇقارالىق اقپارات قۇرالدارى مەن الەۋمەتتىك جەلىلەر ارقىلى دەسترۋكتيۆتى اعىمدار يدەولوگياسىنىڭ زيانى جانە ءدىن سالاسىنداعى مەملەكەتتىك ساياساتتىڭ ماڭىزدى باعىتتارى تۋرالى حالىقتى حاباردار ەتۋ ماڭىزدى. سونداي-اق، بۇل بايقاۋ قاتىسۋشىلاردىڭ شىعارماشىلىعىن شىڭداۋعا، دارىندارىن پاش ەتۋگە، وزدەرىن تانىتۋعا بەرىلگەن ۇلكەن مۇمكىندىك.
«ماقالالار، پوستتار، الەۋمەتتىك روليكتەر كونكۋرس تاقىرىبىنا سايكەس بولۋى ءتيىس. دەسترۋكتيۆتى ءدىني اعىمدار يدەولوگياسىنىڭ بەدەلىن ءتۇسىرۋ، راديكالدى ءدىني يدەولوگيانىڭ زياندىلىعى تۋرالى حالىقتى حاباردار ەتۋ، ءدىني ەكسترەميزمگە قارسى تۇرۋ جانە كونفەسسياارالىق كەلىسىم، قوعامداعى تۇراقتىلىق يدەيالارىن نىعايتۋ سەكىلدى وزەكتى تاقىرىپتاردىڭ جان-جاقتى تالدانۋى، تەرەڭدىگى، ناقتى دالەلەردەردىڭ بولۋى، مازمۇندىلىعى سەكىلدى شارتتارعا باسا نازار اۋدارىلادى»، – دەپ اتاپ ءوتتى باقداۋلەت ءابدىحاميتوۆ.
بايقاۋ مىنانداي نوميناسيالارعا بولىنەدى:
- عالامتور رەسۋرستارىنداعى ەڭ ۇزدىك قازاق تىلىندەگى ماقالا؛
- عالامتور رەسۋرستارىنداعى ەڭ ۇزدىك ورىس تىلىندەگى ماقالا؛
- عالامتورداعى جانە الەۋمەتتىك جەلىلەردەگى ەڭ ۇزدىك تاقىرىپتىق قىسقا بەينەروليك؛
- ەڭ بەلسەندى بلوگەر.
بايقاۋدىڭ جالپى جۇلدە قورى – 1 350 000 تەڭگە. سونداي-اق، اقشالاي ىنتالاندىرۋ سىيلىقتارى دا بار.
بايقاۋعا 18 جاستان اسقان جۋرناليستەر، بلوگەرلەر، الماتى قالاسىنىڭ بارلىق تۇرعىندارى قاتىسا الادى.
بايقاۋعا قاتىسۋ ءۇشىن قاتىسۋشىلار ءوز جۇمىستارىن جانە وزدەرى تۋرالى اقپاراتتى almaty.baiqau.2023@gmail.com ەلەكتروندى مەكەنجايعا وسى جىلدىڭ 1 قازانىنا دەيىن جولداي الادى. بايقاۋ تۋرالى تولىق اقپارات پەن ءار نوميناسيا بويىنشا تالاپتاردى الماتى قالاسى ءدىن ىستەرى جونىندەگى باسقارمانىڭ رەسمي سايتى مەن din_almaty رەسمي اككاۋنتىندا جاريالانعان ەرەجەدەن كورە الادى.
بايقاۋعا قاتىسۋشىلاردى ماراپاتتاۋ ءراسىمى 2023 جىلدىڭ 20–30 قازان ارالىعىندا وتەدى.