بۇدان بىلاي كادەگە جاراتۋ الىمىن جيناپ، ۇيلەستىرۋ «جاسىل دامۋ» اكسيونەرلىك قوعامىنىڭ قۇزىرىندا بولادى
ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتى مەملەكەتتىك رەتتەۋشىنىڭ ۋتيل الىم مولشەرىن قالاي بەلگىلەيتىنى تۋرالى تۇسىندىرمە اقپارات تاراتتى، دەپ حابارلايدى Almaty-akshamy.kz
«2022 جىلعى 11 قاڭتاردا قازاقستان رەسپۋبليكاسى پارلامەنتى ءماجىلىسىنىڭ وتىرىسىندا سويلەگەن سوزىندە مەملەكەت باسشىسى قاسىم-جومارت توقايەۆ «وكم وپەراتورى» ءجشس-نىڭ كادەگە جاراتۋ الىمىن جۇرگىزۋ جانە كادەگە جاراتۋ الىمىنا يەلىك ەتۋىن توقتاتۋ تۋرالى تاپسىرما بەردى. سونىڭ اياسىندا 2022 جىلعى 18 قاڭتاردا ق ر ۇكىمەتى «ق ر ەكولوگيا، گەولوگيا جانە تابيعي رەسۋرستار مينيسترلىگىنە ۆەدومستۆولىق باعىنىستى ۇيىمداردىڭ كەيبىر ماسەلەلەرى تۋرالى» قاۋلى قابىلدادى. وسىعان بايلانىستى وندىرۋشىلەردىڭ (يمپورتتاۋشىلاردىڭ) كەڭەيتىلگەن مىندەتتەمەلەرىنىڭ وپەراتورى بولىپ مەملەكەتتىك ۇيىم رەتىندە «جاسىل دامۋ» اكسيونەرلىك قوعامى ايقىندالدى. «وكم وپەراتورى» ءجشس-نىڭ كادەگە جاراتۋ الىمىن اكىمشىلەندىرۋ جانە ءتيىستى قاراجاتتارعا بيلىك ەتۋ بولىگىندەگى قىزمەتى توقتاتىلدى»، - دەپ جازىلعان رەسمي تۇسىندىرمەدە.
قازىرگى تاڭدا «وكم وپەراتورى» ءجشس-نىڭ يەلىگىندە بولعان اكتيۆتەردى مەملەكەت مەنشىگىنە قايتارۋ ءۇشىن «جاسىل دامۋ» اق بالانسىنا بەرۋ، اكسيونەرلىك قوعامدى ادىلەت ورگاندارىندا قايتا تىركەۋ سياقتى وپەراسيالار ىسكە اسىرىلىپ جاتىر.
«جاسىل دامۋ» اق – ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ قاراماعىنداعى ۇيىم. كادەگە جاراتۋ الىمىنىڭ كوەففيسيەنتتەرىن تومەندەتۋ ماسەلەسى بويىنشا ۆەدومستۆوارالىق جۇمىس توبى قۇرىلدى. بۇل مولشەرلەمەلەر اعىمداعى جىلدىڭ اقپان ايىنىڭ سوڭىنا دەيىن قارالىپ، بەكىتىلەتىن بولادى.
جوعارىدا كورسەتىلگەن جۇمىس توبىنىڭ قىزمەت ناتيجەلەرى تۋرالى اقپارات مينيسترلىكتىڭ ينتەرنەت-رەسۋرسىندا جاريالانادى. ۆەدومستۆونىڭ باسپا ءسوز قىزمەتىنە حابارلاسقانىمىزدا اتالعان جۇمىس توبىنىڭ قۇرامى ءالى ناقتىلانباعانىن ايتتى.
بۇل جۇمىس توبى يندۋستريا جانە ينفراقۇرىلىمدىق دامۋ مينيسترلىگىمەن بىرلەسە وتىرىپ قۇرىلماق. ياعني، جۇمىس توبى قۇرىلماي تۇرىپ، ۋتيل الىمنىڭ مولشەرى تۋرالى قانداي دا دا ءبىر بولجام ايتۋعا ءالى ەرتە. ال وعان دەيىن كادەگە جاراتۋ الىمى بۇرىنعى مولشەر بويىنشا تولەنۋ كەرەك.
«كورسەتىلگەن ۋاقىتقا دەيىن كادەگە جاراتۋ الىمى «جاسىل دامۋ» اق وپەراتورىنا قولدانىستاعى مولشەرلەمەلەر بويىنشا تولەنەدى»، - دەپ جازادى مينيسترلىكتىڭ باسپا ءسوز قىزمەتى.