2022 جىلعى بەيجىڭ وليمپياداسىنا قاتىساتىن قازاقستان قۇراماسىنىڭ وليمپيادالىق ەكيپيروۆكاسىن دايىنداۋعا ءبىر جىلدان اسا ۋاقىت كەتتى.
ۇلتتىق وليمپيادالىق كوميتەتتىڭ دەرەگىنشە، فورمانىڭ تانىستىرىلىمى وسى اپتادا وتەدى، دەپ حابارلايدى Almaty-akshamy.kz
ۇسىنىستار مەن كەڭەستەردى جيناقتاۋ 2021 جىلدىڭ باسىندا جۇزەگە اسا باستادى. پروسەسكە ەڭ باستى قاتىسۋشىلاردىڭ ءبىرى – سپورتشىلاردىڭ وزدەرى بولاتىن. ولار سپورتتىق ەكيپيروۆكانىڭ ديزاينى، ساپاسى مەن فۋنكسيونالى تۋرالى ءوز ۇسىنىستارىن ايتتى.
قازاقستان ۇلتتىق وليمپيادالىق كوميتەتى كوپتەگەن سۇراقتاردى شەشۋ بارىسىندا اتلەتتەردىڭ پىكىرىنە قۇلاق اساتىنىن تاعى دا دالەلدەدى. بۇل جولى ديزايندى تاڭداۋ جانە وليمپيادالىق فورمانىڭ جيىنتىعىن دايىنداۋدا سپورتشىلاردىڭ ۇسىنىستارى نازارعا الىندى.
«ءبىرىنشى كەزەكتە قولدانۋعا جەڭىل بولعانى قاجەت. ارينە، كوماندامىزدىڭ ءستيلدى بولعانىن دا قالايمىز. ءبىز ءۇشىن ساپا مەن جايلىلىق تا ماڭىزدى. وسى ورايدا، كيىمنىڭ جىلى بولعانىن دا ەسكەرۋ كەرەك»، - دەدى شورت-ترەكتەن قازاقستان كومانداسىنىڭ كوشباسشىسى ابزال اجىعالييەۆ.
«وسىدان ءبىر جىل بۇرىن، الماتىداعى الەم كۋبوگى اياقتالعان سوڭ، بىزگە سپورتتىق فورمانىڭ ءتۇرلى نۇسقالارى مەن ديزاينىن كورسەتتى. كىشىگىرىم دەتالدار مەن ءتۇسىن تاڭداۋعا قاتىستى دا ءبىزدىڭ پىكىرىمىز بەن تىلەگىمىزدى سۇرادى. وليمپيادالىق ەكيپيروۆكا ءاربىر اتلەت ءۇشىن وتە ماڭىزدى. ويتكەنى، ويىن كەزىندە ءبىزدىڭ قاي كومانداعا تيەسىلى ەكەنىمىزدى ءدال وسى سپورتتىق كيىم ارقىلى انىقتايدى. ەشكىم كۇندەلىكتى كيىممەن جۇرمەيدى، ءبارىمىز دە ۇلتتىق قۇراما فورماسىن كيەمىز. جازعى ويىندارداعى فورما بارلىعىنا ۇنادى، قىسقى وليمپيادانىڭ ەپيكيروۆكاسى دا كوڭىلدەن شىعادى دەپ ويلايمىن. ادەمى بولاتىنى ءسوزسىز»، - دەدى فريستايل-اكروباتيكادان قازاقستان كومانداسىنىڭ ۇزدىگى جانبوتا الدابەرگەنوۆا.