بۇگىنگى قوعامدا كورشى جۇڭگو ەلىمەن اراداعى قارىم-قاتىناس تۋرالى سان الۋان پىكىرلەر بار.
اسىرەسە سوڭعى ۆيزا ماسەلەسى توڭىرەگىندە الىپ قاشپا اڭگىمەلەردىڭ كوبەيگەندىگىن ايتۋىمىز كەرەك. دەسەكتە، ۆيزاسىز قاتىناس جاساۋدىڭ پايدالى جاقتارى بارشىلىق ەكەنىن ارنايى ماماندار ايتۋدا. ءبىز تەلەجۇرگىزۋشى ولگا سپيرينانىڭ پىكىرىن بىلگەن ەدىك.
-وسى كۇنگە دەيىن ۆيزاسىز كىرۋ مۇمكىندىگى، مەنىڭ ويىمشا ول جاقسى جاڭالىق. قازاقستاندىقتار قىتايعا ءجيى بارىپ تۇرادى. ەمدەلۋگە دە بارادى. جاسايتىن كاسىپكەرلەر دە بار. سوندىقتان بۇل ءبىز ءۇشىن ءتيىمدى. ءبىز تەك قانا ۇتامىز دەپ ويلايمىن. ونىڭ ۇستىنە كەشە عانا قازاقستان اسسامبلەياسىنىڭ سەسسياسى ءوتتى. سول جەردە مەملەكەت باسشىسى قازاقستان ءتولقۇجاتىنىڭ قانداي بەدەلگە يە ەكەنىن اتاپ ءوتتى. ۆيزا الۋدىڭ ءوزى ۇلكەن پروبلەما عوي نەگىزى. ويتكەنى قۇجاتتاردى جينايسىڭ، تاپسىراسىڭ، كۇتەسىڭ. ال سول ۆيزانى ساعان بەرە مە، بەرمەي مە؟ ول بولەك ءبىر ماسەلە. ودان كەيىن ۆيزانى الۋ ءۇشىن قوسىمشا قاراجات جۇمساۋىڭ كەرەك. ءقازىر ءبىز سول پروبلەمادان قۇتىلدىق.
تۋريستەر وزدەرى ءبىزدىڭ ەلگە كەلگەن كەزدە وزدەرىنىڭ اقشالارىن قالدىرادى. ياعني، تۋريزم سالاسىن دامىتىپ، ەكونوميكانى كوتەرىپ، ەلىمىزدى بايىتادى. سوندىقتان، بۇل جەردە كەمشىلىكتەردى كورىپ تۇرعان جوقپىن. كەرىسىنشە ارتىقشىلىقتاردى بايقاپ وتىرمىن،-دەدى ول.