بالالاردى ارنايى پسيحولوگيالىق-پەداگوگيكالىق قولداۋ ايتارلىقتاي كەڭەيىپ كەلەدى.
قازاقستاندا بالالار جىلىندا 6 پسيحولوگيالىق-مەديسينالىق-پەداگوگيكالىق كونسۋلتاسيا، 19 پسيحولوگيالىق-پەداگوگيكالىق تۇزەتۋ كابينەتى جانە 7 وڭالتۋ ورتالىعى اشىلادى، دەپ حابارلايدى Almaty-akshamy.kz Ortcom.kz cايتىنا سىلتەمە جاساپ.
وقۋ-اعارتۋ مينيسترلىگىنىڭ مالىمەتىنشە، ولار بالالارعا الەۋمەتتىك مەديسينالىق-پەداگوگيكالىق جانە تۇزەتۋ ارقىلى قولداۋ كورسەتۋگە قاجەتتىلىك بار وڭىرلەردە قۇرىلادى. بۇگىنگى كۇنى ەلىمىزدە 88 پسيحولوگيالىق-مەديسينالىق-پەداگوگيكالىق كونسۋلتاسيا، 211 پسيحولوگيالىق-پەداگوگيكالىق تۇزەتۋ كابينەتى، 14 وڭالتۋ ورتالىعى جانە 213 ارنايى ءبىلىم بەرۋ ۇيىمى جۇمىس ىستەيدى.
«پمپك، تۇزەتۋ كابينەتتەرىنىڭ سانى جىل سايىن ارتىپ كەلەدى. وقۋ-اعارتۋ مينيسترلىگى بۇل جۇمىستى باقىلاۋدا ۇستاپ وتىر. بىلتىر قاراعاندى، اقتاۋ قالالارىندا، ماڭعىستاۋ وبلىسىنىڭ بەينەۋ اۋدانىندا، الماتى وبلىسىنىڭ اۋىلدارىندا جانە قاپشاعاي قالاسىندا پسيحولوگيالىق-مەديسينالىق-پەداگوگيكالىق كونسۋلتاسيالار اشىلدى. 2021 جىلى 13 تۇزەتۋ كابينەتى اشىلدى. وسىلايشا، بالالاردى ارنايى پسيحولوگيالىق-پەداگوگيكالىق قولداۋ ايتارلىقتاي كەڭەيىپ كەلەدى»، - دەدى وقۋ-اعارتۋ مينيسترلىگى ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ ديرەكتورى ايگەرىم كۇدەرينوۆا.
سونىمەن قاتار ەلىمىزدە ارنايى ءبىلىم بەرۋ ۇيىمدارىنىڭ سانى دا ايتارلىقتاي ءوستى. بالالار جىلىندا تاراز، ورال جانە قاراعاندى قالالارىندا ءاۋتيزمى بار بالالارعا ارنالعان 3 قولداۋ ورتالىعى اشىلدى. ەرەكشە بالالارمەن تاجىريبەلى ماماندار جۇمىس ىستەيدى. وڭالتۋ جانە پسيحولوگيالىق-پەداگوگيكالىق تۇزەتۋ قىزمەتتەرى مەملەكەتتىك قىزمەت بولىپ ەسەپتەلەدى جانە ول تەگىن كورسەتىلەدى.