قالا اكىمىنىڭ ورىنباسارى الىشەر ءابدىقادىروۆ تۇركيادان كەلگەن ينۆەستورمەن كەزدەستى، ول - İskefe توبىنىڭ ورىنداۋشى كوميتەتىنىڭ مۇشەسى سەرتاش احمەت ليەۆەنت. ەكى تاراپ الماتى يندۋستريالىق ايماعىندا جەلاتين وندىرەتىن زاۋىت سالۋعا قاتىستى ءبىرقاتار سۇراقتاردى تالقىلادى، دەپ حابارلايدى Almaty-akshamy.kz.
شەتەلدىك كومپانيانىڭ جوباسى الماتى قالاسىنىڭ وڭىرلىك ۇيلەستىرۋ كەڭەسىنىڭ 2021 جىلعى 21 جەلتوقسانداعى حاتتامالىق شەشىمىنە سايكەس يندۋستريالىق ايماق قاتىسۋشىلارىنىڭ تىزىمىنە ەنگىزىلگەن. جوبانى جۇزەگە اسىرۋ ءۇشىن 4،5 گا جەر ۋچاسكەسى ءبولىندى. ينۆەستور بولاشاقتا 100-دەن استام تۇراقتى جۇمىس ورنىن قامتاماسىز ەتە وتىرىپ، زاۋىت قۇرىلىسىنا شامامەن 9،8 ملرد. تەڭگە سالۋدى جوسپارلاپ وتىر. كاسىپورىننىڭ وندىرىستىك قۋاتى جىلىنا 7 مىڭ توننادان استام «حالال» ستاندارتتى جەلاتين شىعارۋعا مۇمكىندىك بەرەدى. قازىرگى ۋاقىتتا «Halavet KZ» ج ش س جوبالىق قۇجاتتامانى قازاقستاننىڭ قۇرىلىس نورمالارى مەن ستاندارتتارىنا بەيىمدەۋ ءراسىمىن جۇرگىزۋدە. زاۋىت 2024 جىلى اشىلادى دەپ جوسپارلانىپ وتىر.
جەلاتين ءوندىرىسى ءۇشىن شيكىزات رەتىندە جەرگىلىكتى ءىقم تەرىلەرى پايدالانىلماق، ياعني ەل اۋماعىن قامتۋ ۇلەسى كەمىندە 60%-دى قۇرايدى. كومپانيا ماماندارىنىڭ ايتۋىنشا، بۇگىنگى تاڭدا قازاقستاندا تاماق، كوسمەتيكالىق جانە فارماسيەۆتيكالىق ونەركاسىپ كاسىپورىندارى ءوز ونىمدەرىن ءوندىرۋ ءۇشىن جەلاتيندى تەك شەتەلدەن الدىرتادى، سوندىقتان الماتىدا زاۋىتتى اشۋ وتاندىق وندىرۋشىلەرگە ساپالى شيكىزاتتىڭ قولجەتىمدى بولۋىنا مۇمكىندىك بەرەدى.
انىقتاما:
«Halavet KZ» ج ش س 1957 جىلى تۇركيادا قۇرىلعان Iskefe حولدينگىنىڭ قۇرامىنا كىرەدى جانە 7 تەرى زاۋىتىن، جەلاتين، اقۋىز، گيدروليزاتتار، جانۋارلارعا ارنالعان سۇيىق امينقىشقىلدارىن وندىرەتىن زاۋىتتاردى، عىلىمي-زەرتتەۋ ورتالىعى مەن سىناق زەرتحانالارىن بىرىكتىرەدى. ەۋروپا مەن ازيانىڭ ساۋدا نارىعىنداعى سيىر جەلاتينىنە الەمدىك قاجەتتىلىكتىڭ 6%-ى Iskefe Holding ۇلەسىنە تيەسىلى.