الماتىداعى ۇلتتىق ۇلاننىڭ 3650 اسكەري ءبولىمىنىڭ سپورت زالىندا وتان قورعاۋشىلار كۇنىنە وراي ۇستەل تەننيسىنەن ارداگەرلەر اراسىندا اشىق تۋرنير ءوتتى. قۇقىقتىق ءتارتىپ اسكەرى ارداگەرلەرىنىڭ اراسىندا ۇيىمداستىرىلىپ وتىرعان جارىسقا 18 سپورتشى ارداگەر قاتىستى. ولار جاس ەرەكشەلىكتەرىنە قاراي ەكى توپقا ءبولىنىپ، ءوزارا كىم مىقتىنى انىقتادى.
«وڭتۇستىك» وڭىرلىك قولباسشىلىعى ارداگەرلەر كەڭەسىنىڭ ءتوراعاسى اساتۋللا قۇلاحمەدوۆتىڭ ايتۋىنشا، ءتۋرنيردى وتكىزۋدەگى ماقسات – ورىن الۋ ەمەس، وسكەلەڭ ۇرپاققا ۇلگى بولۋ، ارداگەر سپورتشىلار ساپاسىن جاقسارتۋ، سالاۋاتتى ءومىر سالتىن قالىپتاستىرۋ. سونداي-اق ۇستەل تەنيسىنىڭ جاسقا شەكتەۋ جوقتىعىن كورسەتە وتىرىپ، بۇل سپورت ءتۇرىن ناسيحاتتاۋ.
قازىرگى كەزدە ارداگەرلەرىمىز جاستارىمىزدى وتانسۇيگىشتىككە، ادامگەرشىلىك پەن رۋحاني تۇرعىدان تاربيەلەۋ جولىندا ءوز ۇلەستەرىن قوسىپ كەلەدى. بۇگىنگى تۋرنير ارداگەرلەر مەن ۇلتىق ۇلان اسكەري قىزمەتشىلەرى اراسىنداعى بايلانىستى ودان ءارى نىعايتۋدىڭ دالەلى ىسپەتتى.
ايتا كەتەيىك، ەلدە قارقىندى دامىپ كەلە جاتقان سپورتتىڭ ءبىرى – ۇستەل تەننيسى. بۇل ناعىز بۇقارالىق ويىن. ءارى ءار جاستاعى ادامدار ءۇشىن قول جەتىمدى. قيمىل قوزعالىستىڭ تەزدىگى، شابۋىلداردىڭ شاپشاڭدىعىمەن، تەحنيكالىق قيىستىرۋلاردىڭ كەنەتتىلىگىمەن وقيعالاردىڭ اسەرلىلىگىمەن وزىنە قاتتى قىزىقتىرادى.
ويىن كەزىندە ويىنشى جالىندى، جىگەرلى كۇشپەن بىرگە دەنە قوزعالىسىنا قوسىمشا كۇش بەرەدى.
جارىسقا قاتىسۋشى ارداگەرلەر اراسىندا ەڭ ەگدە تارتقان شاعىن راكەتكا شەبەرلەرىنىڭ جاسى 85ء-تى قۇرادى. تۋرنيرگە قاتىسۋشىلار جوعارى دەڭگەيدەگى شەبەرلىك پەن سپورتتىق رۋحتى كورسەتتى.
تارتىستى وتكەن سايىس قورىتىندىسى بويىنشا ۇزدىك ويىن ورنەگىن كورسەتكەن 60 جاسقا دەيىنگى ارداگەر تەننيسشىلەر اراسىندا I ورىندى رۋسلان تىنىبايەۆ، II ورىندى جانداربەك بيمۇرزايەۆ، III ورىندى يكرام مامەدوۆ جەڭىپ الدى. ال 60 جاستان جوعارعى «اۋىر ارتيللەريا» اراسىندا I ورىندى بەرىك الماعامبەتوۆ، II ورىندى يسمايل ابيزوۆ، III ورىندى ەركوش كولبايەۆ يەلەندى.