ەلىمىزدە «مەكتەپكە دەيىنگى ۇيىمداردىڭ ۇزدىك پەداگوگتەرى» انىقتالدى
مۇعالىمدەر كۇنى قارساڭىندا ق ر وقۋ-اعارتۋ مينيسترلىگىنىڭ قولداۋىمەن بالالاردى ەرتە دامىتۋ ينستيتۋتى ۇيىمداستىرعان «مەكتەپكە دەيىنگى ۇيىمنىڭ ۇزدىك پەداگوگى» رەسپۋبليكالىق بايقاۋىنىڭ قورىتىندىسى شىعارىلدى. وعان ەلىمىزدىڭ بارلىق وڭىرلەرىنەن مەكتەپكە دەيىنگى ءبىلىم بەرۋدىڭ 227 پەداگوگى قاتىستى.
ماقساتى-مەكتەپكە دەيىنگى تاربيە مەن وقىتۋدى ۇيىمداستىرۋدا زاماناۋي تاسىلدەردى ىسكە اسىرۋ ءۇشىن ۇزدىك پەداگوگيكالىق تاجىريبەلەردى انىقتاۋ جانە تاراتۋ.
ءبىرىنشى تۋردا قاتىسۋشىلار وزدەرىنىڭ پورتفوليولارىن ۇسىنىپ، «مەكتەپ جاسىنا دەيىنگى بالالاردى دامىتۋ مەن تاربيەلەۋدەگى زاماناۋي پەداگوگتىڭ ءرولى» تاقىرىبىندا ەسسە جازدى، سونداي-اق جۇمىس كۇنىنەن بەينەماتەريالدار كورسەتتى. ەكىنشى تۋردا قاتىسۋشىلار وزدەرىنىڭ وقىتۋ جانە تاربيەلەۋ ادىستەمەسىن تانىستىردى.
بايقاۋ قورىتىندىسى بويىنشا باس جۇلدە باتىس قازاقستان وبلىسىنان كەلگەن بالاباقشا تاربيەشىسى ايجان نۇرسەيىتوۆاعا بۇيىردى.
ءى ورىندى باتىس قازاقستان وبلىسىنىڭ № 3 «ەلوچكا» بالاباقشاسىنىڭ تاربيەشىسى ز.ورىنعالييەۆا، قىزىلوردا وبلىسىنىڭ № 19 ساناتوريي-بالاباقشاسىنىڭ تاربيەشىسى ە. ابدۋايتوۆا جانە اقمولا وبلىسىنىڭ «جۇلدىز» بالاباقشاسىنىڭ دەنە شىنىقتىرۋ نۇسقاۋشىسى ا. عابيدۋللينا يەلەندى.
II ورىندى قاراعاندى وبلىسىنىڭ «بالدىرعان» ارنايى بالاباقشاسىنىڭ لوگوپەد-مۇعالىمى ە.دەگتياريەۆا، تاراز قالاسىنىڭ № 8 بوبەكجاي-باقشاسىنىڭ قازاق ءتىلى پەداگوگى ب. ۇمبەتوۆا، شىعىس قازاقستان وبلىسىنىڭ «ەڭلىك» بوبەكجاي-باقشاسىنىڭ مۋزىكالىق جەتەكشىسى ا. بەكشوينوۆا يەلەندى.
III ورىنعا قوستاناي وبلىسىنىڭ № 15 بوبەكجاي تاربيەشىسى ت. كۋدرياۆسيەۆا، جەتىسۋ وبلىسىنىڭ «اراي» بالاباقشاسىنىڭ تاربيەشىسى ا.دۋشابايەۆا، پاۆلودار وبلىسىنىڭ № 8 بالاباقشاسىنىڭ تاربيەشىسى م. سىرىمبايەۆا جانە ۇلىتاۋ وبلىسىنىڭ «اقەركە» بوبەكجايىنىڭ تاربيەشىسى س. يبراگيموۆا لايىق دەپ تانىلدى.
سونداي-اق، جەڭىمپازدارعا «شەبەر پەداگوگ»، «كرەاتيۆتى پەداگوگ»، «ونەرلى پەداگوگ» جانە «جاڭاشىل پەداگوگ» ارنايى نوميناسيالارى تابىستالدى.