«ۇستازىم، ۇلاعاتىم، ۇلگى-ونەگەم!». الماتىدا №178 مامانداندىرىلعان ليسەيدە مۇعالىمدەر كۇنىنە ارنالعان مەرەكەلىك ءىس-شارا ءوتتى.
سالتاناتتى جيىنعا ءبىلىم ورداسىنىڭ ۇلاعاتتى ۇستازدارى مەن وقۋشىلارى قاتىستى. شارا بارىسىندا ليسەي ديرەكتورى قايراتبەك شادييەۆ ارىپتەستەرىن كاسىبي مەرەكەمەن قۇتتىقتاپ، ۇستاز بولۋ – جۇرەكتىڭ باتىرلىعى، سەزىمنىڭ اقىلدىعى ەكەنىن جەتكىزدى.
«ەڭبەكتىڭ ەڭ ۇلكەنى – ءبىلىم. ءبىلىم – جالىقتىرمايتىن جول، تاۋسىلمايتىن قازىنا. ءبىلىم بەرۋ سالاسىندا كوپتەگەن قيىندىقتار پەن قىزىقتار كەزدەسەدى، جاۋاپكەرشىلىگى اۋىر جۇك دەپ ساناۋعا بولادى. ءبىراق ول اۋىرتپاشىلىق، قىزىقتار بالالاردىڭ كوزىندەگى باقىت پەن قۋانىشتى كورگەن كەزدە ۇمىتىلىپ كەتەدى. بالالارمەن بالاشا قۋانىپ، ولاردى جەتىستىككە جەتكەن كەزدە، ولاردىڭ ۇلكەن ومىرگە قادام باسقان كەزىندەگى ماڭىزدى شەشىمدەردى قابىلداۋدا سەنىڭ اتقارعان جۇمىستارىڭنىڭ ناتيجەسى رەتىندە قاراۋعا بولادى. ۇستاز بولۋ – ادامدىقتىڭ ەڭ اسىل قاسيەتتەرىنىڭ ءبىرى. سوندىقتان ۇستازداردى ۇلىقتاۋ – ۇلكەن مارتەبە»،-دەدى قايراتبەك شادييەۆ.
كاسىبي مەرەكەدە ءبىلىم جانە عىلىم سالاسىنا سۇبەلى ۇلەس قوسىپ، جاس ۇرپاقتى ءبىلىم نارىمەن سۋسىنداتىپ، ءارى ونەگەلى تالىم-تاربيە بەرىپ جۇرگەن پەداگوگتار ءتۇرلى العىس حاتتار جانە گراموتالارمەن ماراپاتتالدى. ۇستازدىق ەتكەن، مۇراتقا جەتكەن جاندار ۇلىقتالدى.
№178 مامانداندىرىلعان ليسەيدە 1219 وقۋشى ءبىلىم الىپ جاتىر، 133 ءمۇعالىم جۇمىس ىستەيدى. مۇنداعى مۇعالىم-شەبەر، پەداگوگ-زەرتتەۋشى بىلىكتىلىك ساناتى بويىنشا ۇستازدار ۇلەسى 80 پايىزعا جەتكەن. سونىڭ ىشىندە 42 ءمۇعالىمنىڭ «ماگيستر» دارەجەسى بار. سوڭعى ءۇش جىلدا 3 ءمۇعالىم رەسپۋبليكا كولەمىندە «ۇزدىك پەداگوگ» اتانىپ وتىر. “ۇزدىك پەداگوگ” بايقاۋىنىڭ جەڭىمپازدارى گ.سلامعالييەۆا مەن ت.ساعيولدانوۆ بيىل فينلياندياعا تاعىلىمداماعا باردى. 2016 جىلى الماتى قالاسى اكىمدىگىنىڭ ۇيىمداستىرۋىمەن وتكەن بايقاۋدا ليسەي «ەڭ ۇزدىك مەكتەپ ۇجىمى» اتاعىن جەڭىپ السا، 2020 جىلى «ەڭ ۇزدىك مەكتەپ» نوميناسياسى بويىنشا الماتى قالاسى اكىمىنىڭ 34 ملن گرانتىن ۇتتى. سونىمەن قاتار 2021 جىلى «ەڭ ۇزدىك كىتاپحانا» بايقاۋىنا قاتىسىپ، جەڭىمپاز اتاندى. ءوزىن-وزى باسقارۋ ۇيىمى بويىنشا بىلتىر مەكتەپ وقۋشىلارى ۇزدىك اتانىپ، ءبىرىنشى ورىن يەلەندى. سوڭعى جەتىستىكتەردىڭ ءبىرى – ليسەي رەسپۋبليكا كولەمىندە «ۇزدىك ليسەي» نوميناسياسى بويىنشا ءبىرىنشى ورىندى جەڭىپ الدى.
مەرەكەلىك شارادا وقۋشىلار دا شاكىرتتەر ساناسىنا ءبىلىم ساۋلەسىن شاشىپ، عىلىمنىڭ شىراعىن جاعىپ جۇرگەن مۇعالىمدەرىنە اق تىلەكتەرى مەن جىلى لەبىزدەرىن ءبىلدىرىپ، ءان مەن بيدەن شاشۋ شاشتى.
ەلميرا راپيلوۆا 178 مامانداندىرىلعان ليسەيدىڭ
قازاق ءتىلى جانە ادەبيەتى ءپانىنىڭ ءمۇعالىمى