ۇستازدار بايقاۋىنا قاتىسقىسى كەلەتىندەر سانى ارتىپ كەلەدى

ءبىر اپتا ىشىندە 2،6 مىڭنان استام ءمۇعالىم مەن تاربيەشى نيەت بىلدىرگەن.

«ۇزدىك پەداگوگ-2022» كونكۋرسىنا قاتىسۋعا قۇجات قابىلداۋ جالعاسىپ جاتىر. العاشقى اپتادا ەلىمىزدىڭ ءار وڭىرىنەن 2،6 مىڭنان استام ءمۇعالىم مەن تاربيەشى ءوز وتىنىمدەرىن جولداپ ۇلگەردى، دەپ حابارلايدى Almaty-akshamy.kz.

قۇجات قابىلداۋ 12 قىركۇيەكتە باستالىپ، 2022 جىلعى 22 قىركۇيەككە دەيىن جالعاسادى. بايقاۋعا مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ پەداگوگتەرى قاتىسا الادى. جەڭىمپازدار 3 ملن تەڭگە كولەمىندە سىياقى الادى. بىلتىر ەلىمىزدىڭ ءار وڭىرىنەن 64 ءمۇعالىمنىڭ ءارقايسىسى 3 ملن تەڭگەدەن العان بولاتىن.

«بيىل بايقاۋدى سيفرلاندىرۋدىڭ ارقاسىندا ءبىز كونكۋرستىڭ ءۇش كەزەڭىنە دە قانشا ءمۇعالىم قاتىساتىنىن باقىلاي الامىز. ءبىرىنشى اپتادا https://teachercontest.iac.kz/ ۆەب-پورتالىندا 2 630 ءمۇعالىم مەن تاربيەشى تىركەلدى. بيىل بايقاۋعا قاتىساتىن ءاربىر ءمۇعالىم ساۋالنامانى تولتىرعاننان كەيىن بايقاۋدىڭ ودان ارعى ديناميكاسىن، ياعني قاتىسۋشىلاردىڭ قاي كەزەڭدە ەكەنىن، ولارعا ساراپشىلار قانداي ۇپاي بەرگەنىن باقىلاي الادى»، - دەدى ق ر وقۋ-اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.

«ۇزدىك پەداگوگ» اتاعىنىڭ يەگەرلەرىنە 3 ملن تەڭگە كولەمىندەگى اقشالاي سىياقى عانا ەمەس، توسبەلگىلەر دە بەرىلەدى.

بايقاۋ ەرەجەلەرى تۋرالى قوسىمشا اقپاراتتى وقۋ-اعارتۋ مينيسترلىگىنىڭ سايتىنان دا تابۋعا بولادى.