ماماندار بەيىمدەلگەن نارىقتىق ساقتاندىرۋ مودەلىن قولدانۋ ۇسىنىلاتىنىن ايتتى.
بۇل تۋرالى ق ر دەنساۋلىق ساقتاۋ ءمينيسترى اجار عينيات مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ وڭتايلى تەتىگى رەتىندە شەتەل تاجىريبەسى پىسىقتالعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مينيسترلىك مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ ءتۇرلى مودەلدەرىنە تالداۋ جۇرگىزدى. حالىقارالىق تاجىريبەدە مەديسينا قىزمەتكەرلەرىن قورعاۋ ءۇشىن قورلار مەن قاۋىمداستىقتار (شۆەسيا، كانادا، دانيا) قۇرۋ، سونداي-اق جەكە نارىقتار (اقش، گەرمانيا، جاپونيا، تۇركيا) ارقىلى كاسىپتىك جاۋاپكەرشىلىكتى مىندەتتى ساقتاندىرۋ جۇيەسى قولدانىلادى»، - دەدى اجار عينيات ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ كەزىندە.
ونىڭ ايتۋىنشا، جوعارىدا ايتىلعان حالىقارالىق تاجىريبەنىڭ نەگىزىندە مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدىڭ وڭتايلى تەتىگى رەتىندە شۆەسيا، كانادا، اقش، جاپونيا جانە تۇركيا مودەلدەرى بويىنشا بەيىمدەلگەن نارىقتىق ساقتاندىرۋ مودەلىن قولدانۋ ۇسىنىلادى.
سونىمەن قاتار ول 2017 جىلى مينيسترلىك مەملەكەت باسشىسىنىڭ تاپسىرماسى بويىنشا دەربەس كەپىلدىك بەرۋ قورىن قۇرۋ اياسىندا ىنتىماقتاستىق قاعيداتى بويىنشا ساقتاندىرۋدىڭ الەۋمەتتىك مودەلىن ۇسىنعانىن ەسكە سالدى (جارنا مولشەرىن مەديسينالىق ۇيىم - 50%، مەديسينا قىزمەتكەرى - 50% دەپ ءبولۋ). الايدا زاڭ جوباسى قولداۋ تاپپاي، قابىلدانعان جوق.
«حالىقارالىق تاجىريبەنى تالداۋدىڭ نەگىزىندە، سونداي-اق جۇرتشىلىقتىڭ، مەملەكەتتىك ورگانداردىڭ جانە ساقتاندىرۋ كومپانيالارىنىڭ قاتىسۋىمەن جۇرگىزىلگەن تالقىلاۋلاردىڭ قورىتىندىسى بويىنشا جۇمىس ىستەپ تۇرعان ساقتاندىرۋ كومپانيالارى ارقىلى مەديسينا قىزمەتكەرلەرى كاسىپتىك جاۋاپكەرشىلىگىنىڭ جۇكتەلگەن ساقتاندىرۋ مودەلى قابىلداندى. جۇمىس بەرۋشى - مەديسينالىق ۇيىم ساقتانۋشى بولادى. ال مەديسينا قىزمەتكەرلەرىن ليسەنزيالاۋدى ەنگىزۋ بولاشاقتا مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جۇيەسىنە قاتىسۋشىلاردىڭ جاۋاپكەرشىلىگىن بولۋگە مۇمكىندىك بەرەدى»، - دەدى ۆەدومستۆو باسشىسى.
ونىڭ سوزىنە قاراعاندا، وسى مودەلگە سايكەس، شاعىمدى قاراۋدى مەديسينالىق ۇيىم مەدياسيا ەلەمەنتتەرىن قولدانىپ، سونداي-اق بەيىندى مەديسينالىق قاۋىمداستىقتاردى تارتا وتىرىپ، ىشكى اۋديت قىزمەتىنىڭ دەڭگەيىندە جۇزەگە اسىراتىن بولادى. بۇل كەزەڭدە ماسەلە مەديسينالىق ۇيىمنىڭ وزىندە رەتتەلۋى مۇمكىن.
«پاسيەنت قىزمەتتىڭ شەشىمىمەن كەلىسپەگەن جاعدايدا، شاعىم ساراپتامالىق قورىتىندى بەرۋ ءۇشىن مەديسينالىق جانە فارماسيەۆتيكالىق باقىلاۋ كوميتەتىنىڭ اۋماقتىق بولىمشەسىنە تاپسىرىلاتىن بولادى. وڭ ناتيجە شىعارىلعان جاعدايدا، شاعىم بويىنشا ماتەريالدار، ونىڭ ىشىندە سوت-مەديسينالىق ساراپتامانىڭ قورىتىندىسى مەديسينالىق ۇيىم ساقتاندىرىلعان ساقتاندىرۋ كومپانياسىنا بەرىلەتىن بولادى»، - دەدى اجار عينيات.
«پاسيەنتكە كەلتىرىلگەن زيان ءۇشىن وتەماقى تولەۋدى دەنساۋلىق ساقتاۋ مينيسترلىگى ايقىنداعان جاعدايلار بويىنشا ساقتاندىرۋ كومپانياسى جۇرگىزەدى. تولەمنەن باس تارتقان جانە شەشىممەن قاناعاتتانباعان جاعدايدا پاسيەنت سوتقا جۇگىنۋگە قۇقىلى. سوتقا جۇگىنگەن كەزدە، تولەم جۇرگىزىلمەيدى»، - دەدى مينيستر.