ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىس كۇشتەرىنىڭ اسكەري ينستيتۋتىندا وسى جىلدىڭ 21 شىلدەسىنەن 8 تامىزىنا دەيىن جەرگىلىكتى اسكەري باسقارۋ ورگاندارىنا ءوتىنىش بەرگەن تالاپكەرلەر ىرىكتەۋدەن وتەدى، دەپ حابارلايدى Almaty-akshamy.kz.
وقۋ ورنى «مەملەكەتتىك اۆياسياداعى اۋە كەمەلەرىن ۇشۋعا پايدالانۋ»، «اۆياسيالىق تەحنيكا جانە تەحنولوگيالار»، «ۇشقىشسىز باسقارىلاتىن قۇرىلعىلاردى پايدالانۋ»، «اسكەري مەديسينا»، «اسكەري ىستەگى تەڭىز تەحنيكاسى جانە تەحنولوگيالارى» ماماندىقتارى بويىنشا دايارلايدى.
– جوعارى وقۋ ورنى تاجىريبەلى پروفەسسورلىق-وقىتۋشىلىق كادرلارمەن جاساقتالعان. بۇل ءبىلىم ورداسىندا كۋرسانتتاردى ۇشۋ جانە ينجەنەرلىك-تەحنيكالىق ماماندىقتارعا وقىتۋ ءۇشىن قاجەتتى ماتەريالدىق-تەحنيكالىق بازا بار، – دەپ اتاپ ءوتتى اۋە قورعانىسى كۇشتەرى اسكەري ينستيتۋتىنىڭ باستىعى پولكوۆنيك تالعات سىزدىقوۆ.
وقۋ ورنىنا ىرىكتەۋ بارىسىندا تالاپكەرلەر اسكەري-دارىگەرلىك ساراپتاما جۇرگىزۋ قاعيدالارىنا سايكەس كاسىبي-پسيحولوگيالىق ىرىكتەۋدەن، مەديسينالىق كۋالاندىرۋدان وتەدى، دەنە دايارلىعى جونىندەگى نورماتيۆتەردى تاپسىرادى.
بيىلعى جىلى ينستيتۋت قازاقستاندىقتار ءۇشىن 215 ورىن، رەسەي، ارمەنيا جانە جۇڭگو اسكەري وقۋ ورىندارىنا تۇسەتىن تالاپكەرلەر ءۇشىن 28 ورىن ءبولىپ وتىر. بۇدان باسقا، ۇقشۇ-عا مۇشە مەملەكەتتەر ءۇشىن اسكەري كادرلار دايارلاۋ تۋرالى كەلىسىمگە سايكەس وقۋ ورنى تاجىكستان قارۋلى كۇشتەرىنىڭ وكىلدەرىنە 6 ورىن بەرەدى.
كۋرسانتتاردى «اسكەري ىستەگى تەڭىز تەحنيكاسى جانە تەحنولوگيالار» ماماندىعى بويىنشا ءبىلىم الۋدىڭ ەرەكشەلىكتەرى بار. العاشقى ەكى كۋرستا جالپى ءبىلىم بەرەتىن جانە جالپى اسكەري پاندەردى وقىتۋ اۋە قورعانىسى كۇشتەرىنىڭ اسكەري ينستيتۋتىندا جۇرەدى. ال ءۇشىنشى – بەسىنشى كۋرستارداعى تەڭىز تەحنيكاسىنا قاتىستى بەيىندى پاندەر اقتاۋ ق. شاحماردان ەسەنوۆ اتىنداعى كاسپيي تەحنولوگيا جانە ينجينيرينگ ۋنيۆەرسيتەتىندە وقىتىلادى.
قازاقستاندا اسكەري مامانداردى دايارلاۋ الماتىداعى ەكى جوعارى وقۋ ورنىندا – ارميا گەنەرالى ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىندا جانە راديوەلەكترونيكا جانە بايلانىس اسكەري-ينجەنەرلىك ينستيتۋتىندا، سونداي-اق اقتوبەدەگى ەكى مارتە كەڭەس وداعىنىڭ باتىرى تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا جۇزەگە اسىرىلاتىنىن ايتا كەتكەن ءجون.
بۇل وقۋ ورىندارىندا تاكتيكالىق بۋىن كومانديرلەرى دايىندالادى. ءبىلىم الىپ شىققان تۇلەكتەرگە «لەيتەنانت» اسكەري اتاعى بەرىلەدى.