رەسپۋبليكالىق بيۋدجەتتىڭ تاپشىلىعى قانشا؟

 رەسپۋبليكالىق بيۋدجەتتىڭ تاپشىلىعى 1،5 ترلن تەڭگە جاقىندادى.

بۇل جايىندا ۇلتتىق ەكونوميكا مينيسترلىگىنىڭ 6 ايداعى الەۋمەتتىك-ەكونوميكالىق كورسەتكىشتەر تۋرالى انىقتاماسىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.

«2023 جىلعى قاڭتار-مامىردا مەملەكەتتىك بيۋدجەتكە 9 ترلن 942،6 ملرد تەڭگە تۇسكەن. ونىڭ ىشىندە ترانسفەرتتى ەسەپكە الماعانداعى كىرىستەر – 8 ترلن 29،1 ملرد تەڭگەنى قۇرادى. شىعىستار 10 ترلن 594 ملرد تەڭگە بولدى. ونىڭ ىشىندە شىعىندار – 9 ترلن 997،9 ملرد تەڭگە بولسا، تاپشىلىق – 651،4 ملرد تەڭگەگە جەتتى»، - دەپ جازىلعان قۇجاتتا.

ال رەسپۋبليكالىق بيۋدجەتكە 7 ترلن 568،9 ملرد تەڭگە ءتۇسىم كىرىپ، 9 ترلن 51،8 ملرد تەڭگە شىعىس شىققان. ونىڭ 1 ترلن 482،9 ملرد تەڭگەسى – تاپشىلىق.

«1 ساۋىردەگى جاعداي بويىنشا قازاقستاننىڭ مەملەكەتتىك بورىشى 26 418،9 ملرد تەڭگەنى (59 ملرد اقش دوللارى) نەمەسە بولجامدى ءجىو-نىڭ 21،9%-ىنە تەڭ بولدى. مەملەكەتتىك بورىشتىڭ 86%ء-ىن ۇكىمەتتىڭ بورىشى (22 718 ملرد تگ نەمەسە بولجامدى ءجىو-نىڭ 18،8%) الىپ وتىر.1 ساۋىردەگى جاعداي بويىنشا كەپىلدىكتەر مەن كەپىلگەرلىكتەردى قوسا العانداعى مەملەكەتتىك بورىش 2023 جىلدىڭ باسىمەن سالىستىرعاندا 4،1% ۇلعايىپ، 27 ترلن 728،4 ملرد تەڭگەگە جەتتى. ونىڭ ىشىندە ىشكى بورىش – 18 013،4 ملرد تەڭگە نەمەسە بولجامدى ءجىو-نىڭ 14،9%-ىنە، سىرتقى بورىش – 9 ترلن 715 ملرد تەڭگە نەمەسە 8،1%-ىنە تەڭ»، - دەلىنگەن مينيسترلىك مالىمەتىندە.