Facebook قولدانۋشىسى ايدا ساسىبايەۆا قىرعىزستان پرەزيدەنتى سادىر جاپاروۆتان قىرعىزدارعا ءتىل تيگىزگەنى ءۇشىن كەشىرىم سۇراۋدى تالاپ ەتتى، - دەپ حابارلايدى Almaty-akshamy.kz 24.kg سايتىنا سىلتەمە جاساپ.
ايدا ساسىبايەۆا پرەزيدەنتتىڭ قىرعىزداردى جالقاۋ دەپ اتاعانى ۇناماعانىن اتاپ ءوتتى.
«بۇل مەنىڭ ۇلتتىق ار-نامىسىما تيەدى، مەن سىزدەن كەشىرىم سۇراۋدى تالاپ ەتەمىن. ءوزىڭىزدىڭ ابايسىزدا ايتقان سوزىڭىزبەن مەنىڭ ەلىمە، حالقىمنىڭ بەدەلىنە نۇقسان كەلتىرەسىز. وسىنداي كەمسىتەتىن سيپاتتاما كەسىرىنەن باسقا ەلدەردە ءبىز تۋرالى جاعىمسىز پىكىر تۋىنداۋى مۇمكىن. سونىمەن قاتار، مۇنداي كوزقاراس بالالارعا تەرىس اسەر ەتەدى، بالالاردىڭ ءوزىن، اتا-اناسىن، تۋىستارىن جانە تۇتاستاي العاندا بۇكىل حالىقتى قابىلداۋىن بۇزادى»، - دەپ جازدى ول.
ايدا ساسىبايەۆا پرەزيدەنت «ويلانىپ، كوپشىلىك الدىندا كەشىرىم سۇرايدى» دەگەن ءۇمىتىن ءبىلدىردى.
«ايتپەسە، مەن بارلىق الەۋمەتتىك جەلىلەردە فلەشموب جاريالاۋعا ءماجبۇر بولامىن. بۇل اكسياعا جەتكىلىكتى ادام قوسىلعاندا، ەرەۋىلدى باستايتىن كۇندى انىقتايمىز»، - دەدى ول.
ەسكە سالايىق، بۇعان دەيىن سادىر جاپاروۆ كولىك جانە كوممۋنيكاسيا مينيسترلىگىنە جول تەحنيكاسىن تاپسىرۋ راسىمىندە قازاق پەن قىرعىز - جول سالۋشىلار تۋرالى ءازىل ايتقان بولاتىن. بۇدان كەيىن جاپاروۆ پرەزيدەنت اكىمشىلىگىنە ارنالعان عيمارات قىرعىزداردىڭ جالقاۋلىعىنان باياۋ سالىنىپ جاتقانىن اتاپ ءوتتى.