2035 جىلى مۇنداي كولىكتەردىڭ نارىعى 25 ملرد دوللارعا جەتەدى
ۇشاتىن كولىكتەر بىزگە ءقازىر عىلىمي فانتاستيكا سياقتى كورىنۋى مۇمكىن. الايدا ولاردىڭ ومىرگە كەلۋىنە از ۋاقىت قالدى، دەپ حابارلايدى Almaty-akshamy.kz.
ەuronews.com سايتىنىڭ مالىمەتىنشە، بۇگىنگى تاڭدا ادامدار مەن جۇكتەردى تاسيتىن وزدىگىنەن ۇشاتىن اپپاراتتاردى جاساۋعا قوماقتى قارجى ءبولىنىپ جاتىر. بۇل دەگەنىڭىز ۇشاتىن كولىكتەردىڭ كوپ ۇزاماي ومىرگە كەلەتىنىن بىلدىرەدى.
ءقازىر ادامدار كوپ ۋاقىتىن كولىك كەپتەلىسىندە وتكىزەدى، تىعىز شارۋامەن جۇرگەندەر دەر كەزىندە دىتتەگەن جەرىنە جەتە الماي قاپا بولىپ جاتادى. سوندىقتان كوپشىلىكتى اۆتوموبيلدەن گورى اۋەدە ۇشاتىن كولىكتىڭ ىسكە قوسىلعانى قىزىقتىرادى. مامانداردىڭ بولجامى بويىنشا، 2035 جىلى مۇنداي كولىكتەردىڭ نارىعى 25 ملرد دوللارعا جەتەدى. سول سەبەپتى ينۆەستورلار ۇشاتىن كولىكتەردىڭ جوباسىنا قاراجات قۇيىپ جاتىر ەكەن.
ۇشاتىن كولىكتەردىڭ ءبىرى - تىگىنەن ۇشىپ، قوناتىن eV-TOL اپپاراتى. ول اۋاعا زياندى كومىرقىشقىلدى تاراتپاس ءۇشىن ەلەكتر قوزعالتقىشىمەن جابدىقتالعان.
ءقازىر 20 جولاۋشىعا دەيىن تاسىمالداي الاتىن اپپاراتتى شىعارۋمەن الەم بويىنشا 50-دەن استام كاسىپورىن اينالىسىپ جاتىر. سونىڭ ءبىرى تۇركيالىق AirCar ستارتاپى. ىستامبۇلدىق جوبا 2017 جىلدان بەرى قالاداعى كولىك كەپتەلىسى مەن اۋانى لاستاۋ ماسەلەسىن شەشۋگە تىرىسىپ جاتىر. AirCar باستى ماقساتى – ەلەكتر قوزعالتقىشىمەن جابدىقتالعان ۇشقىشسىز اۋە تاكسيى پاركىن قۇرۋ.
شاعىن كولىكتەردى مىڭداعان سىناقتان وتكىزگەننەن كەيىن بيىلدان باساپ تولىق كولەمدى اپپاراتتى سىناقتان وتكىزۋدى باستالعان. كومپانيانىڭ نەگىزىن قالاۋشى ەرايا التىنبوزاردىڭ ايتۋىنشا، اۋە تاكسيى ارقىلى جولاۋشىلاردى تاسىمالداۋ 2025 جىلى ىسكە قوسىلادى. الايدا، ول ءۇشىن بىرنەشە كەدەرگىنى ەڭسەرۋ قاجەت.
مۇنداي كەدەرگىنىڭ ءبىرى – تابىس تابۋ. بەرلين تەحنيكالىق ۋنيۆەرسيتەتىنىڭ پروفەسسورى اندرەاس باردەنحاگەننىڭ پايىمداۋىنشا، ۇشاتىن كولىككە قاراعاندا ادەتتەگى پويىز بەرلين ورتالىعىنان اۋەجايعا دەيىن ادامداردى اناعۇرلىم كوپ جەتكىزەدى. ەگەر ۇشاتىن كولىك ارقىلى جۇزدەگەن ادامدى تاسىمالداۋ باستالسا اۋە كەڭىستىگىندەگى جۇكتەمە شاماندان تىس ارتادى. بۇل قالا تۇرعىندارىنا ۇناي قويماۋى مۇمكىن. سوندىقتان ۇشاتىن تاكسي قىزمەتىنە قالتالى ادامداردىڭ ءبىر بولىگى عانا جۇگىنۋى مۇمكىن.