تۇركيادا وتكەن فەستيۆالدە «قازاقفيلم» كينوستۋدياسى ارنايى جۇلدەمەن ماراپاتتالدى

كينوفەستيۆالگە بيىل 13 ەلدەن بارلىعى 42 كينوتۋىندى قاتىستى

ىستانبۇل قالاسىندا وتكەن Korkut Ata Turkic World Film Festival كينوفەستيۆالىنىڭ سالتاناتتىندا ش.ايمانوۆ «قازاقفيلم» كينوستۋدياسى «تۇركى ەلدەرى كينەماتوگرافياسىنا قوسقان ۇلەسى ءۇشىن» ارنايى جۇلدەمەن ماراپاتتالدى. بۇل ناگرادانى كينوستۋديانىڭ پرەزيدەنتى اقان ساتايەۆقا تابىستادى، دەپ حابارلايدى Almaty-akshamy.kz «قازاقفيلم» كينوستۋدياسىنا سىلتەمە جاساپ.

ماراپاتتاۋ سالتاناتى ادەتتەگىدەي قىزىل كىلەم ۇستىنەن ءوتى راسىمىمەن باستالدى.  بۇل شاراعا قازاقستاننىڭ دەلەگاسياسى – قازاقستاننىڭ حالىق ءارتيسى ءاسانالى ءاشىموۆ، «قازاقفيلم» كينوستۋدياسىنىڭ پرەزيدەنتى اقان ساتايەۆ، كينوستۋديانىڭ ءوندىرىس بويىنشا ۆيسە-پرەزيدەنتى ايدار باتالوۆ، «ۇلتتىق كينونى قولداۋ مەملەكەتتىك ورتالىعى» كەق باس پروديۋسەرى اداي ءابىلدينوۆ، قازاقستاننىڭ ەڭبەك سىڭىرگەن قايراتكەرى رۋستەم ابدىراشيەۆ، اكتەر بەرىك ايتجانوۆ، اكتەر ەركەبۇلان دايىروۆ اكتريسالار الميرا تۇرسىن جانە مادينا ەسمانوۆا، رەجيسسەر نۇرعيسا ءالمۇرات، پروديۋسەر نۇرلان قويانبايەۆ جانە باسقالارى قاتىستى. فەستيۆالدىڭ جابىلۋ سالتاناتىنا ق ر مادەنيەت جانە سپورت ءمينيسترى اقتوتى رايىمقۇلوۆا دا قاتىستى.

ايتا كەتسەك، فەستيۆال شەڭبەرىندە قازاقستان، ءازىربايجان، تۇركيا، وزبەكستان جانە قىرعىزستان مينيسترلەرى جوعارىدا اتالعان مەملەكەتتەردە «قوقىت اتا» فەستيۆالىن وتكىزۋ، سونداي-اق كينو ونەرى سالاسىندا ىنتىماقتاستىق جونىندە مەموراندۋمعا قول قويدى.

تۇركيادا العاش رەت وتكىزىلىپ وتىرعان Korkut Ata Turkic World Film Festival كينوفەستيۆالىندە بيىل 13 ەلدەن بارلىعى 42 كينوتۋىندى قاتىستى.

فەستيۆالدىڭ اشىلۋ سالتاناتىندا رەجيسسەر اقان ساتايەۆتىڭ «توميريس» ءفيلمى كورسەتىلدى.