سونىمەن قاتار، پرەزيدەنت ءقازىر سۋتەگى ەنەرگەتيكاسىنىڭ ماڭىزى ارتىپ كەلە جاتقانىن ەسكە سالدى
ق ر پرەزيدەنتى قاسىم-جومارت توقايەۆ كومىرتەگى بەيتاراپتىعىنا قول جەتكىزۋ وزەكتى ماسەلەگە اينالعانىن اتاپ ءوتتى، – دەپ حابارلايدى Almaty-akshamy.kz قازاقپاراتا سىلتەمە جاساپ.
«ءقازىر دۇنيەجۇزى ەكولوگيالىق تۇيتكىلدەردى شەشۋگە ەرەكشە ءمان بەرۋدە. كومىرتەگى بەيتاراپتىعىنا قول جەتكىزۋ وزەكتى ماسەلەگە اينالدى. پايدالى قازبالاردى جاپپاي يگەرۋدەن باس تارتىپ جاتقان ەلدەردىڭ سانى ارتىپ كەلەدى. ءبىز بۇل ۇدەرىستەن تىس قالا المايمىز. ماسەلەنى ءتيىمدى شەشۋ جولىن قاراستىرۋىمىز كەرەك. قازاقستاننىڭ كومىرسۋتەگى قورى مول. سوعان قاراماستان، ءبىز جاڭارتىلاتىن قۋات كوزدەرىن دامىتا بەرەمىز. بۇل مىندەت «جاسىل ەكونوميكاعا» كوشۋ تۋرالى تۇجىرىمدامادا كورىنىس تاپتى. جوسپارلانعان شارالار 2060 جىلعا قاراي كومىرتەگىدەن ارىلۋعا جول اشادى. سونداي-اق، الداعى ون جىلدا پارنيكتى گاز شىعارۋدى 15 پايىزعا ازايتۋعا مۇمكىندىك بەرەدى. وسىنىڭ اياسىندا ءبىز 2025 جىلعا دەيىن 500 مىڭ گەكتار جەرگە 2 ميلليارد ءتۇپ اعاش وتىرعىزۋدى جوسپارلاۋدامىز»، – دەدى مەملەكەت باسشىسى تۇركى مەملەكەتتەرى ۇيىمىنىڭ سامميتىندە.
بۇعان قوسا ءقازىر ەلىمىزدەگى جاڭارتىلاتىن قۋاتتىڭ ۇلەسىن 3 پايىزعا جەتكىزىلدى.
«ونى 2030 جىلعا قاراي 15 پايىزعا دەيىن ارتتىرامىز. سول ماقساتپەن نۇر-سۇلتان قالاسىندا «جاسىل تەحنولوگيالار مەن ينۆەستيسيالىق جوبالاردىڭ حالىقارالىق ورتالىعىن» اشتىق»، – دەدى پرەزيدەنت.
سونىمەن قاتار ق. توقايەۆ ءقازىر سۋتەگى ەنەرگەتيكاسىنىڭ ماڭىزى ارتىپ كەلە جاتقانىن ەسكە سالدى. حالىقارالىق قاۋىمداستىق ونى «تازا» وتىننىڭ جاڭا ءتۇرى دەپ سانايدى.
«ءبىز بۇل سالانى دامىتۋ ءۇشىن ارنايى ورتالىق قۇرىپ، يننوۆاسيانى پايدالانۋ تاجىريبەسىن زەرتتەۋگە كىرىستىك. قازاقستاندا جاسىل سۋتەگىنىڭ ونەركاسىپتىك كلاستەرىن قۇرۋعا مول مۇمكىندىك بار. ەلىمىزدىڭ عىلىمي الەۋەتى جەتكىلىكتى، بىلىكتى كادرلارمەن دە قامتاماسىز ەتە الامىز. وسى ورايدا، ەلدەرىمىزدىڭ باستى عىلىمي مەكەمەلەرىن جۇمىلدىرىپ، حالىقارالىق كونسورسيۋم قۇرۋدى ۇسىنامىن. بۇل قۇرىلىم سۋتەگىنى وندىرەتىن، ونى ساقتاپ، تاسىمالدايتىن جاڭا تەحنولوگيانى دامىتۋ ءۇشىن قاجەت. مۇندا عالىمدارىمىز باس قوسىپ، ءوزارا تاجىريبە الماسۋىنا بولادى»، – دەدى مەملەكەت باسشىسى.
بۇدان بۇرىن حابارلانعانداي، «تۇركىتىلدەس مەملەكەتتەردىڭ ىنتىماقتاستىق كەڭەسى» ەندى «تۇركى مەملەكەتتەرى ۇيىمى» دەپ اتالدى.