بۇگىن اۆستراليادا Asia Pacific Screen Awards ازيالىق بەدەلدى كينوسىيلىعى ءوز جەڭىمپازدارىنىڭ ەسىمدەرىن جاريالادى.
بيىلعى جىلى ءۇش قازاقستاندىق فيلم – اسحات كۋچينچيرەكوۆتىڭ «باۋىرىنا سالۋ»، دارحان تولەگەنوۆتىڭ «اعايىندى» جانە ايسۇلتان سەيىتوۆتىڭ «قاش» كارتينالارى جۇلدەگەرلەر قاتارىنا ەندى. ايتا كەتەتىن جايت - ءۇش فيلم دە رەجيسسەرلەردىڭ دەبيۋتتىك جۇمىستارى، دەپ حابارلايدى Almaty-akshamy.kz ۇلتتىق كينونى قولداۋ ورتالىعىنىڭ باسپا ءسوز قىزمەتىنە سىلتەمە جاساپ.
ونىڭ ىشىندە ەكى فيلم، اتاپ ايتساق، «باۋىرىنا سالۋ» مەن «اعايىندى» مادەنيەت جانە اقپارات مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن تۇسىرىلگەن.
«باۋىرىنا سالۋ» «ۇزدىك جاستار ءفيلمى» نوميناسياسىندا جەڭىسكە جەتسە، «اعايىندى» كارتيناسىندا باستى رولدەردى سومداعان ايبار سالى مەن الىشەر يسمايلوۆ «ۇزدىك جاڭا قويىلىم» ءۇشىن جۇلدەگە يە بولدى. ال «قاش» تۋىندىسى «ۇزدىك وپەراتورلىق جۇمىس» نوميناسياسىندا ماراپاتقا يە بولدى.
ال APSA-نىڭ باس جۇلدەسىن «ۇزدىك فيلم» نوميناسياسىندا ايگىلى نەمىس رەجيسسەرى ۆيم ۆەندەرستىڭ «پرەكراسنىە دني» اتتى جاپوندىق كارتيناسى جەڭىپ الدى. بيىلعى جىلى «ساندەنس» جانە بەرلين كينوفەستيۆالىنە قاتىسقان، فەستيۆالداردىڭ حيتى بولعان «پروشلىە جيزني» ءفيلمى سەلين سونعا ەڭ ۇزدىك رەجيسسەر اتاعىن اكەلدى. كەشتىڭ تاعى ءبىر ءفاۆوريتى ريۋسۋكە حاماگۋتيدىڭ «زلا نە سۋششەستۆۋەت» جاپوندىق دراماسى قازىلار القاسىنىڭ گران-پريىنە قول جەتكىزدى.
«باۋىرىنا سالۋ» ءفيلمى ءسابي كەزىنەن اجەسىنىڭ تاربيەسىندە بولعان بالانىڭ وقيعاسىن باياندايدى. تۋىندىنىڭ تۇساۋى وسى جىلى يسپانيانىڭ سان-سەباستيان قالاسىندا وتكەن بەدەلدى كينوفەستيۆالدە كەسىلدى، وندا ول «جاڭا رەجيسسەرلەر» باعدارلاماسىندا كورسەتىلدى.
«اعايىندى» ءفيلمى وتكەن جىلدىڭ قىركۇيەگىندە گەرمانياداعى Oldenburg International Film Festival فەستيۆالىندە "كينو رۋحى" سىيلىعىن جەڭىپ العان بولاتىن، ال وسى جىلدىڭ ءساۋىر ايىندا قازاقستاننىڭ كينوسىنشىلار قاۋىمداستىعى بۇل كارتينانى 2022 جىلدىڭ "ۇزدىك دراماسى" دەپ تانىدى. سونىمەن قاتار، "اعايىندى" – يتاليا، رەسەي، وزبەكستان، جۇڭگو، يسپانيا جانە بولگارياداعى حالىقارالىق كينوفەستيۆالدەردە 10 ماراپاتقا يە بولدى.
«قاش» ءفيلمى قازاق دالاسىنداعى 30-شى جىلدارداعى اشارشىلىق كەزىندەگى حالىقتىڭ قيىن تاعدىرى تۋرالى باياندايدى. ءقابىر قازۋشى يساتاي ءوز اۋىلىن قۇتقارۋ ءۇشىن ءقاۋىپتى ميسسياعا بارادى، ءبىراق جولدا وعان كەزبە ادام كەزدەسىپ، ونى اداستىرادى. ايتا كەتسەك، ايسۇلتان سەيىتوۆ جازدا شانحاي حالىقارالىق كينوفەستيۆالىندە وسى جۇمىسى ءۇشىن «ۇزدىك رەجيسسەر» نوميناسياسىن جەڭىپ الدى.
APSA سىيلىعى 2007 جىلى يۋنەسكو مەن FIAPF - حالىقارالىق كينوپروديۋسەرلەر قاۋىمداستىعىنىڭ كومەگىمەن اۆستراليا ۇكىمەتىنىڭ باستاماسىمەن قۇرىلعان. ول جىل سايىن حالىقارالىق ماراپاتتار اراسىندا ماڭىزدى ورىن الۋدا جانە كينەماتوگرافيالىق الەمدە «ازيالىق وسكار» دەپ اتالادى.
سىيلىق جىل سايىن ازيا-تىنىق مۇحيتى ايماعىنىڭ 70-تەن استام ەلىنىڭ وكىلدەرى جاساعان ەڭ كورنەكتى كارتينالاردى اتاپ وتەدى. وتكەن جىلدار جەڭىمپازدارىنىڭ قاتارىندا 2019 جىلى «ۇزدىك رەجيسسەر» نوميناسياسىندا جەڭىسكە جەتكەن بەلگىلى قازاقستاندىق رەجيسسەر ءادىلحان ەرجانوۆ بار.