«ۇلى دالا جورىعىنىڭ» قاتىسۋشىلارى ءۇشىنشى كەزەڭدى وندىرۋگە اتتاندى. قاتىسۋشىلار اراسىنان سولتۇستىك قازاقستان وبلىسىنىڭ كومانداسى شىعىپ قالدى، دەپ حابارلايدى ۇيىمداستىرۋ كوميتەتىنە Almaty-akshamy.kz سىلتەمە جاساپ.
بايگەنىڭ تالابى بويىنشا ءار كەزەڭدە ۋاقىتتان ۇتىپ، العاشقى بولىپ كەلگەن كوماندا كەلەسى كۇنگى جارىستى ءبىرىنشى بولىپ باستايدى. ەكىنشى كەزەڭ قورىتىندىسى بويىنشا ماڭعىستاۋ وبلىسىنىڭ كومانداسى كوش باستاسا، قوستاناي كومانداسى ەكىنشى جەتتى، جەتىسۋ وبلىسىنىڭ شاباندوزدارى كومبەنى ءۇشىنشى بولىپ قيدى. شىمكەنت قالاسى مەن باتىس قازاقستان، شىعىس قازاقستان وبلىستارىنىڭ كوماندالارى بولدىرعان اتتارىن جارىستان شىعارۋعا تۋرا كەلدى.
«Sport Qory» تۋريزم يندۋسترياسى مەن سپورتتى قولداۋ قورى باس سەرىكتەسى سانالاتىن «ۇلى دالا جورىعى» رەسپۋبليكالىق مارافون-بايگەسى 13 كەزەڭمەن اياقتالادى. تۇركىستان قالاسىنا دەيىنگى 1300 شاقىرىمدىق قاشىقتىقتا ءبىرىنشى بولىپ كەلگەن كومانداعا 30 ميلليون تەڭگە، ەكىنشى ورىنعا 20 ميلليون، ءۇشىنشى ورىنعا تۇراقتاعان كومانداعا 15 ميلليون تەڭگە سىياقى بەرىلەدى.