«قازاقستان» تەلەراديوكورپوراسياسى تاۋەلسىزدىكتىڭ 30 جىلدىعىنا وراي 3 مىڭ قازاقستاندىقتىڭ قاتىسۋىمەن مەملەكەتتىك ءانۇرانعا بەينەبايان ءتۇسىردى. جوبا قازاقستان ازاماتتارىنىڭ پاتريوتتىق سەزىمىن كوتەرىپ، ەل مەن جەرگە سۇيىسپەنشىلىگىن ارتتىرۋ ماقساتىندا قولعا الىندى، دەپ حابارلايدى Almaty-akshamy.kz.
بەينەبايانعا ق ر ۇلتتىق قاۋىپسىزدىك كوميتەتى شەكارا قىزمەتى جانە ق ر ۇلتتىق ۇلانىنىڭ 180 ساربازى، «استانا وپەرا» مەملەكەتتىك وپەرا جانە بالەت تەاترى مەن نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ 120 ءارتىسى، «قازاقستان» تەلەراديوكورپوراسياسىنىڭ 150 قىزمەتكەرى جانە ءوڭىر جاستارى، ستۋدەنتتەر، سالا ماماندارى مەن قاراپايىم ەل تۇرعىندارى قاتىستى.
ءتۇسىرىلىم جۇمىستارى نۇر-سۇلتان، الماتى، اقتاۋ، رۋحاني استانا - تۇركىستان قالالارىندا جۇرگىزىلىپ، نەگىزگى كورىنىسكە ەلورداداعى «قازاق ەلى» مونۋمەنتى، «استانا وپەرا» مەملەكەتتىك وپەرا جانە بالەت تەاترى، قازاقستان رەسپۋبليكاسىنىڭ ۇلتتىق مۋزەيى، «قازمەديا» ورتالىعى» تەلەراديوكەشەنى، الماتىداعى رەسپۋبليكا الاڭى، ءال-فارابي اتىنداعى قازاق ۇلتتىق ۋنيۆەرسيتەتى، «كوكتوبە» دەمالىس كەشەنى، تۇركىستانداعى «كەرۋەن ساراي» تۋريستىك كەشەنى، قوجا احمەت ياساۋي قورىق-مۇراجايى، كاسپيي تەڭىزى مەن الماتى وبلىسىنىڭ شارىن شاتقالى، اقمولا وبلىسىنداعى بۋراباي ۇلتتىق پاركى جانە ماڭعىستاۋ وبلىسىنىڭ اقەسپە تاۋى الىندى.
ءانۇراندى ەل تۇرعىندارىمەن بىرگە وپەرا جانە ەسترادا انشىلەرى س.بايعوجين، ا.جىلتىركوزوۆ. ج. شىبىقبايەۆ، ن.ۇسەنبايەۆا، ە. ۆيسينسكايا، ت. زابيروۆا، ا. بالاجانوۆا، م. سالىقوۆ، ك. تولەنبايەۆا، و. التىنبەكوۆ، ب. قيلىمحان، م. اناربەك، ە. ناريمان ۇلى ورىندادى.
سونىمەن بىرگە بەينەبايانعا ق ر سىرتقى ىستەر مينيسترلىگىمەن بىرلەسە اقش، تۇركيا، رەسەي، جۇڭگو ەلىندە قىزمەت ەتىپ جانە ءبىلىم الىپ جۇرگەن ەل ازاماتتارى مەن وسى ەلدەردەگى قانداستار توپتاستىرىلدى. «قازاقستان» تەلەراديوكورپوراسياسى بەينەبايان تۇسىرىلىمىنە قولداۋ كورسەتكەنى ءۇشىن ەلىمىزدىڭ سىرتقى ىستەر مينيسترلىگىنە العىس بىلدىرەدى.
بەينەبايان كورپوراسياعا قاراستى «Qazaqstan»، «Abai tv»، «Balapan»، «Qazsport» تەلەارنالارى مەن 14 ايماقتىق ارنا ەفيرىنەن 15 جەلتوقساننان باستاپ كۇن سايىن كورسەتىلەدى.