سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ تاشكەنتتە وتكەن قازاقستان، قىرعىزستان جانە وزبەكستان سۋ شارۋاشىلىعى جانە ەنەرگەتيكا ۆەدومستۆولارى باسشىلارىنىڭ كەزدەسۋىنە قاتىستى.
سونداي-اق، جيىنعا ق ر ەنەرگەتيكا ءمينيسترى الماسادام ساتقالييەۆ، وزبەكستاننىڭ سۋ شارۋاشىلىعى ءمينيسترى شاۆكات حامرايەۆ، وزبەكستاننىڭ ەنەرگەتيكا ءمينيسترى جۋرابەك مىرزاماحمۋدوۆ، قىرعىزستاننىڭ ەنەرگەتيكا ءمينيسترى تاالايبەك يبرايەۆ قاتىستى. قوناق رەتىندە ءازىربايجان ەنەرگەتيكا ءمينيسترىنىڭ ورىنباسارى كامال ابباسوۆ قاتىستى.
وتىرىستا وڭىردەگى سۋ-ەنەرگەتيكالىق ىنتىماقتاستىق ماسەلەلەرى قارالدى. Cونداي-اق، قازاقستاننىڭ وڭتۇستىگىندەگى ەگىس القاپتارىن سۋارۋعا سۋ الىناتىن قىرعىزستانداعى توقتاعۇل سۋ قويماسىنىڭ الدىن الا جۇمىس كەستەسى قارالدى.
بۇل ءىس-شارالار 2025 جىلدىڭ سۋارۋ كەزەڭىندە پايدالانۋ ءۇشىن توقتاعۇل سۋ قويماسىندا قاجەتتى سۋ كولەمىن ۇستاپ تۇرۋعا باعىتتالعان.
«سۋ-ەنەرگەتيكا سالاسى - ءبىزدىڭ مەملەكەتتەرىمىز ءۇشىن ىنتىماقتاستىقتىڭ ماڭىزدى باعىتى بولىپ تابىلادى. بيىلعى جىل وڭىردەگى تىعىز قارىم-قاتىناستى دامىتۋدىڭ جارقىن ۇلگىسى بولدى. بىرلەسىپ قابىلدانعان ءىس-شارالاردىڭ ناتيجەسىندە ءبىز سۋ قاجەتتىلىكتەرىن قاناعاتتاندىرا الدىق. ءبىرىنشى كەزەكتە، سولتۇستىك ارال تەڭىزىنە سۋ جىبەرۋ جوسپارى ورىندالدى. كۇزگى-قىسقى كەزەڭنەن ءقاۋىپسىز ءوتۋ جانە كەلەسى جىلى شارۋالاردى سۋارمالى سۋمەن تۇراقتى قامتاماسىز ەتۋ ءۇشىن قول جەتكىزىلگەن كەلىسىمدەردى ۇستانۋدى جالعاستىرامىز»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.