الماتى پوليسياسى ءوز قىزمەتىنە زاماناۋي بەينەباقىلاۋ جانە بەينە تالداۋ تەحنولوگيالارىن ەنگىزۋدى جالعاستىرا وتىرىپ، قوعامدىق ءتارتىپ پەن بالالاردى قورعاۋ سالاسىندا ەلەۋلى قادام جاسادى.
كامەلەتكە تولماعاندار ىستەرى جونىندەگى ينسپەكتورلار TargetEYE پلاتفورماسىنا قول جەتكىزىپ، وقۋدان ءوتتى. بۇل الماتى قالاسىنداعى مەكتەپتەر مەن بالاباقشالارداعى قاۋىپسىزدىكتى باقىلاۋدىڭ تيىمدىلىگىن ارتتىرۋعا مۇمكىندىك بەردى، دەپ حابارلايدى aqshamnews.kz. Polisia.kz-كە سىلتەمە جاساپ.
الماتىدا ءبىرىڭعاي بەينەباقىلاۋ جۇيەسىن ەنگىزۋدىڭ ارقاسىندا كامەلەتكە تولماعاندار ىستەرى جونىندەگى ينسپەكتورلار ءوز جۇمىستارىندا تاعى ءبىر تاپتىرماس قۇرالعا يە بولدى. ەندى ءاربىر ينسپەكتوردىڭ وقۋ ورىندارىندا ورناتىلعان كامەرالاردى جىلدام قاراۋعا، بەينەجازبالار مۇراعاتىنا جانە بەينەساراپتاما وقيعالارىنا قول جەتكىزۋگە مۇمكىندىگى بار. بۇل ۇزدىكسىز باقىلاۋدى جانە بولعان وقيعالار مەن ازاماتتاردىڭ وتىنىشتەرىنە دەر كەزىندە جاۋاپ بەرۋ مۇمكىندىگىن قامتاماسىز ەتەدى.
– الماتى قالاسى اكىمدىگى ەلىمىزدە العاش رەت 2024 جىلى مەملەكەتتىك ءبىلىم بەرۋ جانە مەكتەپكە دەيىنگى ءبىلىم بەرۋ مەكەمەلەرىندە “ءبىرىڭعاي قاۋىپسىزدىك جۇيەسى” جوباسىن ءساتتى جۇزەگە اسىردى. 400-دەن استام مەكتەپ پەن بالاباقشا پد-نىڭ جەدەل باسقارۋ ورتالىعىنا قوسىلعان سيفرلىق كامەرالارىمەن، بەينەفوندارمەن، تۋرنيكەتتەر، دابىل تۇيمەلەرىمەن جابدىقتالدى. كۇزەت جانە ءورت دابىلدارى دا ەنگىزىلدى. قاۋىپسىزدىك جۇيەسىنىڭ بارلىق ەلەمەنتتەرى ءبىرتۇتاس قاۋىپسىزدىك ەكوجۇيەسىنە بىرىكتىرىلگەن. ءبىلىم بەرۋ ۇيىمدارىنىڭ بۇكىل اۋماعىن قامتيتىن 22 000 كامەرا دەرەكتەردى ءبىرىڭعاي بەينەباقىلاۋ جۇيەسىنە ناقتى ۋاقىت رەجيمىندە جىبەرەدى. ورتالىقتاندىرىلعان باسقارۋ جانە دەرەكتەردى تالداۋ ينسپەكتورلارعا ناقتى ۋاقىت رەجيمىندە نە بولىپ جاتقانىن باقىلاۋعا، نەگىزگى اناليتيكالىق كورسەتكىشتەر بويىنشا اقپارات الۋعا مۇمكىندىك بەرەدى – كوپ ادامداردىڭ شوعىرلانۋىنان جانە ىقتيمال توبەلەستەردەن باستاپ دەرەۋ ارالاسۋدى قاجەت ەتەتىن كۇدىكتى جاعدايلارعا دەيىن. ماسەلەن، جۇيە رەسپۋبليكالىق ىزدەۋدە جۇرگەن ادامداردى انىقتاپ، ولاردىڭ مەكتەپكە كىرگەنىن تىركەي الادى، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
پوليسيا باستىعىنىڭ ايتۋىنشا، پلاتفورما بەت-الپەتتەر مەن وقيعالاردى اۆتوماتتى تۇردە تانۋ ءۇشىن جاساندى ينتەللەكتتىڭ جەتىلدىرىلگەن الگوريتمدەرى مەن بەينە-اناليتيكالىق مودۋلدەردى پايدالانادى، بۇل جاۋاپ بەرۋ پروسەسىن جىلدامداتادى.
– الگوريتمدەر كۇدىكتى ادامداردى ولاردىڭ كەسكىنىنىڭ بولىكتەرى نەمەسە كەسكىندەرى بويىنشا (مىسالى، بەتپەردە نەمەسە كوزىلدىرىكپەن جاسىرىلعان جاعدايدا) انىقتاۋعا، سونداي-اق ءبىلىم بەرۋ ۇيىمدارىنىڭ اۋماعىنداعى كۇدىكتى جاعدايلاردى تانۋعا قابىلەتتى. بۇل بالالار مەن جاسوسپىرىمدەردىڭ ومىرىندەگى قايعىلى وقيعالاردىڭ الدىن الۋعا، ولاردىڭ ءومىرى مەن دەنساۋلىعىن ساقتاۋعا كومەكتەسەدى. سونداي-اق ينسپەكتورلارعا ادامداردىڭ جاپپاي شوعىرلانۋىن باقىلاۋعا، توبەلەس نەمەسە باسقا قاقتىعىستار سياقتى ىقتيمال ءقاۋىپتى جاعدايلارعا جىلدام ارەكەت ەتۋگە مۇمكىندىك بەرەدى. كارتاگرافيالىق قىزمەتپەن ينتەگراسيا ناقتى ۋاقىت رەجيمىندە كۇدىكتىنىڭ باعىتىن قۇرۋعا جانە باسقا پوليسيا قىزمەتتەرىمەن ارەكەتتى ۇيلەستىرۋگە مۇمكىندىك بەرەدى، – دەدى ارىستانعاني زاپپاروۆ.