استانادا بۇرىنعى ايەلى مەن ءۇش بالاسىن تۇرىپ جاتقان ۇيىنەن ماجبۇرلەپ شىعارىپ جىبەرگەن ەر ادام قامالدى.
استانالىق دانا اتەشوۆا بۇرىنعى كۇيەۋى مارات ايتەنوۆتىڭ پوليسەيلەرمەن جانە جەكە سوت ورىنداۋشىلارمەن بىرگە ۇيىنە كەلىپ، بالالاردى بىر-بىرلەپ ۇيدەن ماجبۇرلەپ شىعارعانىن، ءوزىن سوققىعا جىققانىن الەۋمەتتىك جەلىدە جاريالاعان، دەپ حابارلايدى Almaty-akshamy.kz
وسىعان وراي استانا پوليسياسى تەرگەۋ باستالعانىن مالىمدەدى.
مارات ايتەنوۆ — شىمكەنتتىڭ بۇرىنعى اكىمى مۇرات ايتەنوۆتىڭ تۋعان باۋىرى.
«جەكە سوت ورىنداۋشىلارى ۇيدەن شىعارۋ تۋرالى سوت شەشىمىن ورىنداپ جاتقاندا بۇرىنعى ەرلى-زايىپتىنىڭ اراسىندا جانجال تۋدى. كۇش قولدانۋ دەرەگى بويىنشا ايتەنوۆكە قاتىستى تەرگەۋ باستالدى. ءتيىستى ساراپتاما تاعايىندالدى. سونىڭ ناتيجەسىنە قاراي پروسەسسۋالدى شەشىم قابىلدانادى»، - دەدى ۆەدومستۆوداعىلار.
بۇگىن ادۆوكات دامير يشمامەتوۆ الەۋمەتتىك جەلىدەگى پاراقشاسىندا مارات ايتەنوۆتىڭ قاماۋعا الىنعانىن جەتكىزدى.
ونىڭ ايتۋىنشا، اكىمشىلىك كودەكستىڭ 73-بابى بويىنشا تەرگەۋ سوتى بولادى.
«قىلمىستىق كودەكستىڭ 108-بابى، 1ء-بولىمى بويىنشا ءىس قوزعالدى. مۇنىمەن توقتاپ قالمايمىز، كۇدىكتىنىڭ ارەكەتىندە وزگە دە قىلمىستىڭ بەلگىلەرى بار، پوليسيادان جازا قولدانۋىن تالاپ ەتەمىز. سونداي-اق ەر ادام ايەلدى ۇرىپ جاتقاندا ارالاسپاي قۇر قاراپ تۇرعان پوليسيا قىزمەتكەرلەرىنە قاتىستى قىزمەتتىك تەرگەۋ ءجۇرىپ جاتىر. بىرەۋى ءتىپتى سوت ورىنداۋشىلارىنا كومەكتەسىپ، بالانى جىلاعان كۇيى كوتەرىپ سىرتقا شىعارىپ تاستادى»، - دەيدى قورعاۋشى.
قازاقستاننىڭ بالا قۇقىقتارى جونىندەگى ۋاكىلى دينارا زاكييەۆا بالا قۇقىعىنىڭ بۇزىلۋىنا بايلانىستى باس پروكۋراتۋرادان شارا قولدانۋىن ءوتىنىپ ۇسىنىم جولداعان.