ناعىز قاھارماندىق ارەكەت
ەرتىس ءوڭىرىنىڭ تۇرعىنى، سۋعا باتىپ كەتە جازداعان ءۇش بالانى قۇتقارعان اندرەي كارانداشوۆ ماراپاتقا يە بولدى، دەپ حابارلايدى Almaty-akshamy.kz BAQ.KZ-كە سىلتەمە جاساپ. 33 جاستاعى اندرەي كارانداشوۆ اقتوعاي اۋدانى پريرەچەنسك اۋىلىنىڭ تۋماسى. دەمالىس كۇنى وزەنگە بالىق اۋلاۋعا بارعاندا سۋعا باتىپ بارا جاتقان ءۇش بالانى كورگەن.
«قارماعىما بالىق تۇسپەدى. ۇيگە قايتايىن دەپ جاتقاندا، ءۇش بالاعا كوزىم شالدى. ايقايلاپ ەدىم، جاۋاپ بولمادى. سول ساتتە ولاردىڭ ەس-تۇسسىز بولعانىن ءبىلدىم. ولار جاعادان 10 مەترلىك جەردە قالقىپ جاتتى. ءۇشىنشى بالا سۋ تۇبىنە ءتۇسىپ كەتىپتى. ابىروي بولعاندا، ۇستاپ الىپ، شىعاردىم. ەكى ۇل بالا ەسىن بىردەن جينادى، ءۇشىنشى بالاعا جاساندى دەمالۋ مەن جۇرەك ماسساجىن جاسادىم. اعايىندى بالالاردا كەزەك كەزەك جاعاعا شىعاردىم»، - دەيدى اندرەي كارانداشوۆ.
بۇگىننىڭ باتىرى اتانعان اندرەي وبلىس باسشىلىعى مەن توتەنشە جاعدايلار مينيسترلىگى تاراپىنان ماراپاتتارعا يە بولدى. ەڭ باستىسى، ءۇش بالاقايدىڭ اتا-اناسىنىڭ زور العىسىن ارقالادى. وبلىس اكىمى ءابىلقايىر سقاقوۆ اقتوعايلىق ازاماتقا تۋعان اۋىلىنان ءۇش بولمەلى پاتەردىڭ كىلتىن تابىستادى. سونىمەن قاتار، «وبلىس الدىندا سىڭىرگەن ەڭبەگى ءۇشىن» توسبەلگىسى تابىس ەتىلدى.
«بۇل شىن مانىندە ەرلىك ەمەس، ءبىز ءۇشىن باعا جەتپەس جانە ءسىز قۇتقارعان بالالار ءۇشىن اسا ماڭىزدى ناعىز قاھارماندىق ارەكەت. مەن وڭىرىمىزدە ءسىز سياقتى ازاماتتار بولعانى ءۇشىن ماقتانامىن. اتا-اناڭىزعا وزىڭىزدەي ەلىمىزدىڭ ادال ازاماتىن تاربيەلەگەنى ءۇشىن كوپ راحمەت. سىزگە ءوڭىر تۇرعىندارىنىڭ اتىنان العىس ايتامىن»، - دەدى ايماق باسشىسى ءابىلقايىر سقاقوۆ.
اندەي كارانداشوۆتىڭ ەكى بالاسى بار. اۋىل شارۋاشىلىعى سالاسىندا ەڭبەك ەتەدى. بۇعان دەيىن جالدامالى ۇيدە تۇرعان. ەندى ءوز پاتەرىندە تۇراتىن بولادى. ايتا كەتەيىك، بۇل – اقتوعايلىق تۇرعىن جاساعان العاشقى ەرلىك ەمەس. بۇعان دەيىن، بالا كەزىندە سەگىز جاسار جەتكىنشەكتى دە قۇتقارىپ قالعان.