«بابالار اماناتى»
قازاقستاننىڭ تۇركياداعى ەلشىلىگىنىڭ ۇيىمداستىرۋىمەن جانە تۇركسوي حالىقارالىق ۇيىمى مەن «كوك تۋ» قازاق مادەنيەتى قوعامىنىڭ قولداۋىمەن «الاش» قوزعالىسىنىڭ بەلگىلى كوسەمى، ۇلتتىق عىلىمنىڭ نەگىزىن سالۋشى، اقىن، اۋدارماشى احمەت بايتۇرسىن ۇلىنىڭ تۋعانىنا 150 جىل تولۋىنا وراي قازاقستان جانە رەسەي سۋرەتشىلەر وداعىنىڭ مۇشەسى، «ۇزدىك پەداگوگ – 2021» كونكۋرسىنىڭ جەڭىمپازى، پروفەسسور جانە «بابالار اماناتى» حالىقارالىق جوباسىنىڭ اۆتورى قاناعات كودەكوۆتىڭ كىتابىنىڭ 4ء-شى تومىنىڭ تۇساۋكەسەرى ءوتتى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
ءىس-شاراعا قازاقستان ەلشىسى ەركەبۇلان ساپييەۆ، تۇركسوي حالىقارالىق ۇيىمى مەن «كوك تۋ» قازاق مادەنيەتى قوعامىنىڭ وكىلدەرى، دۇنيەجۇزى قازاقتارى قاۋىمداستىعىنىڭ ءتورالقا مۇشەسى، «قازاق ەلى» جۋرنالىنىڭ باس رەداكتورى سەركان دينچتۇرك، انكارانىڭ ۋنيۆەرسيتەتتەرىندە ءبىلىم الىپ جۇرگەن قازاق-تۇرىك دوكتورانتتارى مەن ستۋدەنتتەرى جانە ب ا ق وكىلدەرى قاتىستى.
ەلشى حح عاسىردىڭ باسىنداعى قازاق زيالىلارىنىڭ كورنەكتى وكىلى احمەت بايتۇرسىن ۇلىنىڭ شىعارماشىلىعى مەن عىلىمي ەڭبەكتەرى تۋرالى قىسقاشا ايتىپ بەردى.
س. دينچتۇرك بەلگىلى سۋرەتشى ق. كودەكوۆقا «بابالار اماناتى» اتتى كىتابى، اتا-بابالارىمىزدىڭ قالدىرعان مۇرالارىن كەلەشەك ۇرپاققا جەتكىزۋدە، تانىتۋداعى سۋرەتشىنىڭ اتقارىپ وتىرعان زور ەڭبەگىنە ريزاشىلىعىن ءبىلدىردى.
ءوز كەزەگىندە ق. كودەكوۆ «بابالار اماناتى» ۇلتتىق جوباسىنا توقتالا كەلە، اتالعان جوبادا كاسىبي جانە كاسىپقوي سۋرەتشىلەردىڭ ەڭبەكتەرىنىڭ جيناعىنان قۇرالعان ءوزىنىڭ كەزەكتى تۋىندىنى – ۇلت ۇستازى احمەت بايتۇرسىن ۇلىنىڭ 150 جىلدىق قۇرمەتىنە ارنالعانىن جانە مۇنداي تۋىندىلار جاس بۋىندى تاريحقا باۋلىپ، وتانسۇيگىشتىككە جەتەلەيتىنىن اتاپ ءوتتى.
جيىن سوڭىندا ەلشى ە. ساپييەۆ ق. كودەكوۆتى احمەت بايتۇرسىن ۇلىنىڭ 150 جىلدىعىنا وراي قوسقان ۇلەسى ءۇشىن العىس حاتپەن ماراپاتتادى.