اقمولا وبلىسىنا قاراستى ساندىقتاۋ اۋدانىنداعى ءۇش بىردەي اۋىلدىڭ اتاۋى بيىل قازاقشالانادى
وسىلايشا، كەڭەس كەزىندەگى ەسكى اتاۋمەن اتالىپ كەلە جاتقان ەلدى مەكەندەر جاڭاشا سيپاتقا يە بولماق، دەپ حابارلايدى Almaty-akshamy.kz.
بۇل وزگەرىستى جەرگىلىكتى تۇرعىندار تولىق قولداعان. ايتا كەتەيىك، ايماقتا الداعى جىلدارى 100-دەن استام ەلدى مەكەننىڭ اتاۋى وزگەرەدى دەگەن جوسپار بار.
ايماققا حالقىنىڭ ۇيىمشىلدىعى جانە بەرەكە-بىرلىگىمەن تانىمال كراسنايا پوليانا اۋىلى بيىل اقمولالىقتاردى تاعى ءبىر جاعىمدى جاڭالىعىمەن قۋانتتى. ولار قاتار قونعان ءۇش اۋىلدىڭ اتاۋىن قازاقشالاماق. جاڭادان تاڭدالعان اتاۋلار دا ماعىنالى ءارى ادەمى ەستىلەدى.
«كراسنايا پوليانا ءبىزدىڭ ورتالىعىمىز ءارى بەرەكە-بىرلىگىمىزدىڭ نىشانى بولعاندىقتان ءبىز ونى بىرلىك دەپ اتاۋدى ءجون كوردىك. ال پەتريكوۆكا – تۇمار، اربۋزەنكا – اقكەنت بوپ وزگەرەدى. بارلىعى دا حالىقپەن كەڭەسە وتىرىپ تاڭدالدى. بۇل كەزىندە اتا-بابالارىمىزدى باۋىرىنا باسقان قازاق حالقىنا دەگەن قۇرمەتىمىز جانە وتانسۇيگىشتىگىمىزدىڭ بەلگىسى دەپ بىلەرسىزدەر»، - دەدى بىرلىك اۋىلدىق وكرۋگىنىڭ اكىمى انسار يبايەۆ.
اتالعان ءۇش اۋىلدا 1 مىڭنان استام حالىق تۇرادى. ولاردىڭ 99 پروسەنتى ينگۋشتار مەن شەشەندەر. اۋىلدىقتاردىڭ نەگىزگى كاسىبى مال شارۋاشىلىعى. مۇندا 6 ءىرى سەرىكتەستىك پەن 40 شاقتى شارۋا قوجالىعى بار.
ءبىر سوزبەن ايتساق، جۇمىسسىز جۇرگەن ادام جوق. ال بىرلىك اۋىلدىق وكرۋگى اقساقالدار القاسى بار وبلىستاعى ساۋساقپەن سانارلىق ەلدى مەكەندەردىڭ ءبىرى. سوندىقتان مۇندا قانداي ماسەلە بولماسىن قاريالاردىڭ قاراۋىنان وتەدى.
«اۋىلدىڭ اتاۋىن وزگەرتۋ دەگەن وسىدان 30 جىل بۇرىن بولۋى ءتيىس شارا ەدى. ءبىراق ءساتى بيىلعا كەلگەن ەكەن. ءالى دە كەش ەمەس. حالىقتىڭ ءبارى قولداپ وتىر. ءبىز بۇل ماسەلەنى سوڭعى رەت 2015 جىلى ءبىر كوتەرگەنبىز. الايدا اتاۋلاردى اۋىستىرۋعا موراتوريي جاريالانىپ، باستامامىز سول كۇيى قالىپ قويعان بولاتىن. ەندى بىزدەگى وڭ وزگەرىستەر باسقا اۋىلدارعا دا ۇلگى بولسا دەيمىز»، دەدى كراسنايا پوليانا اۋىلىنىڭ تۇرعىنى ماگۋماد ۋماروۆ.
جەرگىلىكتى اكىمدىك اۋىلداردىڭ اتاۋىن وزگەرتىپ عانا قويماي، ولاردى اجارلاندىرۋعا دا مىقتاپ كىرىسكەن. ماسەلەن، وتكەن جىلدارى مۇندا ەلدى مەكەندەردىڭ جارىق جەلىسى جاڭارتىلسا، الداعى جىلدارى اۋىز سۋ قۇبىرى تارتىلىپ، كوشەلەر كۇردەلى جوندەلمەك. وسىلايشا وبلىس ورتالىعىنان 150 شاقىرىم جەردە جاتقان اۋىلدىقتار «جاڭا قازاقستانعا» تولىق دايىنبىز» دەپ ازىلدەيدى.