قازاقستانعا دارى-دارمەكتىڭ 83%-ى شەتەلدەن كەلەدى
ەلىمىزدەگى دارى-دارمەك پەن مەديسينالىق قۇرال-جابدىقتىڭ 17%-ى عانا وتاندىق ءونىم. مەملەكەت باسشىسىنىڭ ۇكىمەت الدىنا قويعان تاپسىرماسى بويىنشا ونى الداعى ءۇش جىلدا 50%-عا جەتكىزۋ كەرەك، دەپ حابارلايدى Almaty-akshamy.kz اlmaty.tv-عا سىلتەمە جاساپ.
ءقازىر ەلدە وتاندىق تاۋار وندىرۋشىلەردىڭ ۇلەسى 21-22%. كورسەتكىشتى ارتتىرۋ ءۇشىن ولارمەن «سك-فارماسيا» ارقىلى 10 جىلدىق كەلىسىمشارت جاسالعان. دەمەك، اتالعان كومپانيا وسى ارالىقتا تاۋار ءوندىرۋشى دارى-دارمەگىن شىعارادى. ءسويتىپ مەملەكەت ەسەبىنەن ونى بىرنەشە جىل بويى ساتىپ الۋعا مىندەتتەلەدى دەيدى.
«ياعني، وتاندىق تاۋار وندىرۋشىلەرگە ءوزى شىعارعان دارى-دارمەك كولەمىن مەملەكەتكە ساتىپ، ءوندىرىسىن ودان ءارى دامىتۋعا مۇمكىندىك بەرەدى. دسم-مەن وسىنداي مەحانيزم ەنگىزىلگەن جانە ول سوڭعى جىلدارى ءوزىنىڭ وتە جاقسى ناتيجەلەرىن كورسەتۋدە. سونىڭ ارقاسىندا ەلىمىزدى، پاسيەنتتەردى وتاندىق دارى-دارمەكپەن قامتاماسىز ەتىپ جاتىرمىز»، - دەيدى ق ر دسم دارى-دارمەك ساياساتى دەپارتامەنتىنىڭ ديرەكتورى باۋىرجان ءجۇسىپوۆ.
مينيسترلىك وكىلى تاعى ءبىر تىڭ اقپاراتىن ءبولىستى. ەلىمىزدە «قازبيوفارم» حولدينگى قۇرىلادى. ونىڭ قۇرامىنا ۇلتتىق مەديسينالىق ورتالىقتار كىرەدى. ماقساتى – وتاندىق دارى-دارمەكتى، اسىرەسە وتاندىق عالىمدار ويلاپ تاپقان ۆاكسينانى شىعارۋ بويىنشا جۇمىستى جانداندىرۋ.
«پرەزيدەنت تاپسىرماسىنا سايكەس ارنايى حولدينگ قۇرىلىپ جاتىر. وعان دا ءبىرشاما مىندەت جۇكتەلدى. حولدينگ وتاندىق دارى-دارمەكتى، ءبىزدىڭ عالىمدار ويلاپ تاپقان ۆاكسينانى شىعارۋ بويىنشا شارالار جۇرگىزەدى»، - دەپ مالىمدەدى ب. ءجۇسىپوۆ.
پرەزيدەنت تاپسىرماسىنا سايكەس ەلدەگى دارى-دارمەك ءوندىرىسىن 50 پايىزعا جەتكىزۋ ىسىنە شەتەلدىك سالا ماماندارى تارتىلماق. ول ءۇشىن مينيسترلىك «بيگ فارما» دەپ اتالاتىن كومپانيامەن كەلىسىمگە كەلدى.