بيىل 1 ناۋرىزداعى جاعداي بويىنشا، 2 مىڭ 800 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى، دەپ حابارلايدى اlmaty-akshamy.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، جالپى 1991 جىلدان بەرى رەسپۋبليكاعا 1 ملن 131،1 مىڭ ەتنيكالىق قازاق ورالعان.
جىل باسىنان قازاقستانعا كەلگەن قانداستاردىڭ جارتىسى (49،6%) قىتايدان، 31،9%-ى وزبەكستاننان، 6،8%-ى تۇرىكمەنستاننان، 6،5%-ى موڭعوليادان، 3،9%-ى رەسەيدەن جانە 1،3%-ى باسقا ەلدەردەن كەلگەن.
1 ناۋرىزداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 58،7%، ەڭبەككە قابىلەتتى جاستان كىشى 31،9% جانە زەينەتكەرلەر 9،4% بولدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 16،9%-ى – جوعارى ءبىلىمدى، 21،3%-ىنىڭ ورتا كاسىپتىك ءبىلىمى بار، 55،3%-ى – جالپى ورتا ءبىلىمدى جانە 6،5%-ىنىڭ ءبىلىمى جوق.
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرىنە قونىستاندى.
سونىمەن بىرگە قانداستاردى قونىستاندىرۋ ءۇشىن ەڭبەك كۇشى تاپشى مىنا وڭىرلەر انىقتالدى:
- اقمولا
- اباي
- قوستاناي
- پاۆلودار
- شىعىس قازاقستان
- سولتۇستىك قازاقستان وبلىستارى.
قونىستاندىرۋ وڭىرلەرىندە 2023 جىلعا ارنالعان قانداستاردى قابىلداۋ كۆوتاسى 2 مىڭ 433 ادام بولدى. 2023 جىلعى 1 ناۋىرىزداعى جاعداي بويىنشا قونىستاندىرۋ وڭىرلەرىنە 607 قانداس قونىس اۋداردى.
جوعارىدا اتالعان وڭىرلەرگە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى:
- ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258،4 مىڭ تەڭگە) مولشەرىندە؛
- تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55،3-تەن 110،7 مىڭ تەڭگەگە دەيىن) مولشەرىندە.
جىل باسىنان بەرى 144 قانداسقا ءتۇرلى قولداۋ شارالارى كورسەتىلدى. اتاپ ايتقاندا، 143 ادام تۇراقتى جۇمىسقا ورنالاستى.
سونىمەن قاتار، ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋسيونالدىق شارالار قابىلداندى. تۇرعىن ءۇي ساتىپ الۋ، سالۋ نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4،28 ملن تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.
ەسكە سالا كەتسەك، 2023 جىلى پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلىپ جاتىر. پيلوتتىق جوبا شەڭبەرىندە ەلىمىزگە كەلۋ، جۇمىس ورنى، تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىندە ەتنيكالىق قازاقتاردان جاڭا فورماتتا 6 مىڭ 203 ءوتىنىش قابىلداندى.