قازاقستاندىقتار اندرەي گولۋبيەۆ پەن ياروسلاۆا شۆەدوۆا US Open تۋرنيرىندە ءساتتى ونەر كورسەتۋدە، دەپ حابارلايدى Almaty-akshamy.kz قازاقپارات-قا سىلتەمە جاساپ.
جۇپتىق سىندا «ۇلكەن دۋلىعا» جارىسىنىڭ 15-راكەتكالارى بولىپ تىركەلگەن اندرەي گولۋبيەۆ پەن گەرمانيالىق اندرەاس مەس ەكىنشى اينالىمدا بوسنيالىق توميسلاۆ بركيچ – سەربيالىق نيكولا كاچيچپەن كەزدەستى. قازاقستاندىق-گەرمانيالىق جۇپ 7:5، 6:2 ەسەبىمەن جەڭىسكە جەتتى. اتالمىش دۋەت 1 ساعات 16 مينۋتقا سوزىلعان ماچتا 3 ەيس جاساپ، 6 برەيك-پوينتتىڭ تورتەۋىن پايدالاندى. قارسىلاستارى 1 ەيس، 1 برەيكپەن شەكتەلدى. ا.گولۋبيەۆ پەن ا.مەس ءۇشىنشى اينالىمدا شيرەك فينالعا شىعۋ ءۇشىن وسى ءتۋرنيردىڭ 3-راكەتكالارى، فرانسيالىقتار پەر-يۋگ ەربەر – نيكوليا مايۋمەن تالاسادى. قازاقستان ايەلدەر قۇراماسىنىڭ كاپيتانى ياروسلاۆا شۆەدوۆا ارالاس جۇپتىق سىندا فرانسيالىق فابريس مارتەنمەن شيرەك فينالعا شىقتى. ولار باستاپقى كەزدەسۋىندە دودانىڭ 7-راكەتكالارى، تايبەيلىك چان حاو-چين – جاڭازەلانديالىق مايكل ۆينۋستى 6:4، 3:6، 10:7 ەسەبىمەن ۇتتى. قازاقستاندىق-فرانسيالىق جۇپ ەكىنشى اينالىمدا امەريكالىقتار ساچيا ۆيكەري – ناتان پاشامەن كۇش سىناستى. بۇل جولى دا شۆەدوۆا مەن مارتەن سۋپەر تاي- برەيكتە جەڭىستى جۇلىپ الدى – 6:4، 4:6، 11:9. يا.شۆەدوۆا مەن ف.مارتەن جارتىلاي فينالعا شىعۋ ءۇشىن ۋكراينالىق دايانا ياسترەمسكايا – اۋستراليالىق ماكس پورسەلمەن شەبەرلىك بايقاسادى. تاعى ءبىر قازاقستاندىق گالينا ۆوسكوبويەۆا سەربيالىق نيكولا كاچيچپەن بىرگە باستاپقى كەزدەسۋىندە حورۆاتيالىق داريا يۋراك پەن نيدەرلاندىلىق ماتۆە ميددلكوپتى 6:2، 3:6، 10:8 ەسەبىمەن جەڭدى. دەگەنمەن ەكىنشى اينالىمدا دودانىڭ 3- راكەتكالارى، چيليلىك الەكسا گۋاراچي – ۇلىبريتانيالىق نيل سكۋپسكيگە 7:6 (7:4)، 1:6، 8:10 ەسەبىمەن جول بەرىپ، شيرەك فينالعا وتە الماي قالدى.
ەسكە سالا كەتەيىك، بۇدان بۇرىن US Open تۋرنيرىندە ەلەنا رىباكينانىڭ ءتورتىنشى اينالىمعا شىعا المادى. زارينا دياس پەن اندرەي گولۋبيەۆتىڭ جۇپتىق سىندا ەكىنشى اينالىمعا ءوتتى. زارينا دياس رەسەيلىك ۆارۆارا گراچيەۆامەن بىرگە ەكىنشى اينالىمدا چەحيالىقتار ماريا بوۋزكوۆا – لۋسيا گرادەسكايامەن كەزدەسەدى.