ءتۇسىندىرۋ جۇمىستارى ناتيجەسىندە ادامدار 100-دەن اسا قارۋدى ەرىكتى تۇردە تاپسىرعان.
ق ر ءىىم تەرگەۋ دەپارتامەنتىنىڭ باستىعى سانجار ءادىلوۆتىڭ ايتۋىنشا، ۇرلانعان قارۋدى ساتۋ فاكتىلەرى انىقتالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قىلمىسكەرلەردىڭ ۇرلانعان قارۋدى ساتۋ فاكتىلەرى انىقتالدى. 18 اقپاندا جامبىل وبلىسىنىڭ بايزاق اۋدانىندا جەدەل ءىس-شارالار بارىسىندا ۇرلانعان كالاشنيكوۆ اۆتوماتىن ساتۋ بارىسىندا تاراز قالاسىنىڭ 45 جاسار تۇرعىنىن كريمينالدىق پوليسيا قىزمەتكەرلەرى ۇستادى. جەكە ءتىنتۋ كەزىندە كۇدىكتىدەن قارۋدى ساتۋدان تۇسكەن 300 مىڭ تەڭگە، ال اۆتوماشينا سالونىنان ەكى كالاشنيكوۆ اۆتوماتى وق-دارىسىمەن تاركىلەندى»، - دەدى س.ءادىلوۆ ورتالىق كوممۋنيكاسيالار قىزمەتىندە.
ونىڭ ايتۋىنشا، ءتۇسىندىرۋ جۇمىستارى ناتيجەسىندە ادامدار 100-دەن اسا قارۋدى ەرىكتى تۇردە تاپسىردى.
«قارۋدى ەرىكتى تۇردە تاپسىرعان ادام، ەگەر ونىڭ ارەكەتتەرىندە باسقا قىلمىس قۇرامى بولماسا، قىلمىستىق جاۋاپكەرشىلىككە تارتىلمايتىنىن ەستەرىڭىزگە سالامىن»، - دەدى س.ءادىلوۆ.