ەكى مىڭعا جۋىق ادام قاتىسقان.
جارىسقا سالاۋاتتى ءومىر سالتىن ۇستاناتىن 10 مەن 80 جاس ارالىعىنداعى 2 مىڭعا جۋىق ادام قاتىسىپ، ءتۇرلى قاشىقتىقتاردى جۇگىرىپ ءوتتى، دەپ حابارلايدى Almaty-akshamy.kz Almaty.tv سىلتەمە جاساپ.
شارادا الماتىلىقتاردان وزگە، ادەتتەگىدەي، ەلىمىزدىڭ تۇكپىر-تۇكپىرىنەن كەلگەن سپورتشىلار دا قاتىستى.
جارىستى جۇگىرۋدى كۇندەلىكتى داعدىعا اينالدىرعان قالا تۇرعىندارى اسىعا كۇتكەنى انىق. ولاردىڭ اراسىندا ءتۇرلى سالادا قىزمەت ەتەتىن مامانداردان باستاپ، كاسىبي سپورتشىلارعا دەيىن بار. قاتىسۋشىلار 3 قاشىقتىق بويىنشا سىنعا ءتۇستى. بالالار 3 شاقىرىمعا جۇگىرسە، ەرەكسەكتەر 10، سكانديناۆيالىق جۇرىسپەن اينالىساتىندار 7 شاقىرىمدىق باسەكەدە وزدەرىن سىناپ كوردى.
«جاستاردى وسىنداي سپورتپەن اينالىسۋعا شاقىرامىن. مەنەن ۇلگى الىڭىزدار. 42 شاقىرىمدى 73 رەت جۇگىرگەنمىن. مىناداي ماۋسىمدىق جۇگىرۋدى مۇلدە جىبەرمەيمىن»، - دەيدى قاتىسۋشى تىلەۋجان قاناپيانوۆ.
ۇيىمداستىرۋشىلار ەلىمىزدە كارانتين تالاپتارىنىڭ جەڭىلدەگەنىنە قاراماستان، سپورتشىلاردىڭ قاۋىپسىزدىگىنە اسا ءمان بەرگەنىن ايتادى. ياعني، قاتىسۋشىلار الدىن الا «اشىقپەن» تەكسەرىلىپ، كەيىن جۇگىرۋگە مۇمكىندىك الدى. ولار سونداي-اق جولدىڭ ۋاقىتشا جابىلعانىنا قاراماستان، تۇسىنىستىك تانىتقان كولىك جۇرگىزۋشىلەرىنە دە العىسىن ايتتى.
«ءبىزدىڭ قىسقى مارافونىمىز وسىمەن 8ء-شى رەت ءوتىپ جاتىر. جۇگىرۋدى داعدىعا اينالدىرعان ادام ۇنەمى كوڭىلدى، ومىرگە دەگەن قۇشتارلىعى ارتىپ، دەنساۋلىعى جاقسارا تۇسەدى. ءقازىر جاسوسپىرىمدەرگە دە قاتىسۋعا مۇمكىندىك بەرىپ جاتىرمىز. ولاردى پاندەميا ءورشىپ تۇرعان كەزدە توقتاتقان ەدىك»، - دەدى ۇيىمداستىرۋشى سالتانات قازىبايەۆا.
ودان بولەك، ۇيىمداستىرۋشىلار جىل اياعىنا دەيىن وسىنداي ون شاقتى مارافون وتكىزۋدى جوسپارلاپ وتىر. كەلەسى شارا 13 ناۋرىزعا بەلگىلەنسە، ەڭ ۇلكەن مارافون 25 قىركۇيەكتە وتەدى.