ۇرلانعان قارۋدى ءوز ەركىمەن تاپسىرعان ادام جاۋاپكەرشىلىكتەن بوساتىلادى

قارۋدى ءوز ەركىمەن تاپسىرعانداردىڭ ارەكەتتەرىندە باسقا دا قىلمىس قۇرامى بولماۋى كەرەك.

تارتىپسىزدىك كەزىندە ۇرلانعان قارۋدى ءوز ەرىكتەرىمەن تاپسىرعان ادامدار قىلمىستىق جاۋاپتىلىقتان بوساتىلادى، دەپ حابارلايدى Almaty-akshamy.kz

«قۇقىق قورعاۋ ورگاندارى قىلمىستىق ىستەردى تەرگەۋمەن قاتار، ۇرلانعان قارۋدى ىزدەۋ جانە ولاردى تاركىلەۋ جۇمىستارىن جالعاستىرۋدا. ىشكى ىستەر مينيسترلىگىنىڭ وكىلى ايتقانداي، قارۋلاردى ءوز ەركىمەن تاپسىرۋ مۇمكىندىگى بار. ءوز كەزەگىندە باس پروكۋراتۋرا زاڭسىز ساقتالعان قارۋلاردى، وق-دارىلەردى، جارىلعىش زاتتاردى ءوز ەرىكتەرىمەن تاپسىرعان ادامدارعا قىلمىستىق جاۋاپتىلىقتان بوساتۋ كەپىلىن بەرەدى»، - دەدى ەلدوس قيلىمجانوۆ.

ونىڭ ايتۋىنشا، قارۋدى ءوز ەركىمەن تاپسىرعانداردىڭ ارەكەتتەرىندە باسقا دا قىلمىس قۇرامى بولماۋى كەرەك.

«سونىمەن قاتار ازاماتتاردىڭ نازارىنا ايتا كەتەتىن ءجايت، ادام قارۋمەن ءجۇرىپ، قۇقىق قورعاۋ ورگاندارىنا ۇستالسا، ونداي جاعداي ءوز ەركىمەن قارۋدى تاپسىرۋ دەپ تانىلمايدى. ىشكى ىستەر ورگاندارىنا زاڭسىز اينالىمنان اتىس قارۋلارىن الۋ بويىنشا جەدەل ىزدەستىرۋ جانە پروفيلاكتيكالىق ءىس-شارالاردى جانداندىرۋ تۋرالى تاپسىرما بەرىلدى»، - دەدى باس پروكۋراتۋرانىڭ وكىلى.

بۇدان بۇرىن حابارلانعانداي، تارتىپسىزدىك كەزىندە قارۋدى ۇرلاعانى ءۇشىن 98 ادام ۇستالىپ، ۋاقىتشا ۇستاۋ اباقتىسىنا قامالدى جانە ولاردى زاڭسىز ساقتاعانى ءۇشىن 61 ادام ۇستالدى.

«تارتىپسىزدىك كەزىندە 7 اڭشىلىق دۇكەنگە شابۋىل جاسالىپ، تونالدى. ولاردان 1 564 ازاماتتىق قارۋ ۇرلاندى»، - دەدى ق ر ءىىم تەرگەۋ دەپارتامەنتىنىڭ باستىعى سانجار ءادىلوۆ.