ءبۇلدىرشىن قۋانىشىنىڭ سەبەپكەرىنە اينالعان 87 جىلدىق قازىنالى تاريحى بار الماتى مەملەكەتتىك قۋىرشاق تەاترى جاس جەتكىنشەكتەرگە قازاق حالىق ەرتەگىسىنىڭ جەلىسىمەن ساحنالانعان «ۇر، توقپاق!» قويىلىمىنىڭ پرەمەراسىن ۇسىندى.
جاقسىلىق پەن جاماندىقتىڭ، ادالدىق پەن ارامدىقتىڭ ارا-جىگىن ايقىندايتىن بۇل سپەكتاكلدە اڭعال دا سەنگىش، اقكوڭىل دە مەيىرىمدى اقساقال قوشاقانىن ىزدەپ ءجۇرىپ، تۇزاققا ءتۇسىپ قالعان قازدى قۇتقارىپ قالادى. قاراپايىم قازدى ەمەس، تاڭعاجايىپ دانىشپان قازبايدى قۇتقارعان اقساقال مەن كەمپىرى ەكەۋىنىڭ ومىرىنە سول ساتتەن باستاپ ۇلكەن وزگەرىس ەنەدى. قازباي اقساقالعا العىس رەتىندە «ءپىس، قازان»، «قۇس، ەسەك» جانە «ۇر، توقپاق» اتتى ەرەكشە سيقىرلى سىيلىقتار ۇسىنعانىمەن، جەزتىرناقتار ءتۇرلى ادام كەيىپىنە ەنىپ، اقساقالدىڭ سىيلىقتارىن تارتىپ الۋ ماقساتىندا جوسپارلار قۇرادى. دەگەنمەن بۇل تۇزاقتارعا قارسى تۇرىپ، اقساقال ءوز ماقساتىنا جەتەدى.
ۇلتتىق داستۇرمەن ۇتىمدى بەزەندىرىلىپ، اۋەزدى انمەن، كوڭىلدى بيمەن ارلەنگەن ەرتەگى كىشكەنتاي كورەرمەندەرگە قىزىقتى كوڭىل-كۇي سىيلاپ قانا قويماي، بالا ساناسىنىڭ دامۋى مەن رۋحاني، ادامگەرشىلىك قاسيەتتەرىن بويىنا ءسىڭىرىپ، ءتىل العىشتىققا، تارتىپتىلىككە، شىنشىلدىق پەن ۇلكەنگە قۇرمەت كورسەتۋگە ۇندەيدى.
قويىلىمنىڭ اۆتورى – بەلگىلى قالامگەر، اقىن، دراماتۋرگ، ءبىرقاتار بەدەلدى مەملەكەتتىك سىيلىقتاردىڭ لاۋرەاتى قاسىمحان بەگمانوۆ. سپەكتاكلدىڭ سۋرەتشىسى – التىناي ءجۇسىپالى. قويىلىمدى مۋزىكامەن كوركەمدەگەندەر – باقبەرگەن بايشىعاش جانە ارشىن جولداسحان. بۇل قويىلىمدى تەاتر ونەرى سالاسىندا ەسىمى بەلگىلى، ەرتەگى ارقىلى بالانىڭ شىعارماشىلىق قابىلەتىن دامىتۋ، قوعامدىق ومىرگە ارالاسۋى جولىندا ايانباي قىزمەت ەتىپ جۇرگەن، ىزدەنىس ەڭبەگىنىڭ نەگىزىندە قازاقى ەرتەگىلەردى زامانىنا ساي ەتىپ قۋىرشاق تەاترىنىڭ قورجىنىن تولىقتىرىپ جۇرگەن رەجيسسەر ەركەبۇلان قابدىل ساحنالادى.
قۋىرشاق ونەرىنىڭ سان قيلى مۇمكىندىگىن پايدالانا وتىرىپ، كىشكەنتاي كورەرمەندەرىمىزگە جانە ەرەسەكتەرگە دە ەرەكشە اسەر سىيلاۋعا اسىق، جاقسىلىققا جانى قۇمار، ەرتەگىلەر الەمىن سەزىندىرەتىن الماتى مەملەكەتتىك قۋىرشاق تەاترى 18 جەلتوقساندا بارشا كورەرمەن قاۋىمدى تەاترعا شاقىرادى!