تاجىكستان استاناسىندا ۇقشۇ سىرتقى ىستەر، قورعانىس مينيسترلەرى كەڭەسى مەن قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسى ءوتتى.
پرەمەر-مينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى، پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشيەۆ جانە قورعانىس ءمينيسترى مۇرات بەكتانوۆ قۇرامىنا كىرگەن قازاقستان رەسپۋبليكاسىنىڭ دەلەگاسياسى ۇجىمدىق قاۋىپسىزدىك تۋرالى شارت ۇيىمىنىڭ جارعىلىق ورگاندارىنىڭ بىرلەسكەن وتىرىسىنا قاتىستى، دەپ حابارلايدى Almaty-akshamy.kz.
«ءىس-شارا بارىسىندا ۇقشۇ-نىڭ اعىمداعى قىزمەتى جانە ونى دامىتۋ پەرسپەكتيۆالارى تۋرالى كەڭ اۋقىمدى ماسەلەلەر تالقىلاندى. قاتىسۋشىلار وزەكتى حالىقارالىق پروبلەمالار بويىنشا پىكىر الماستى. اۋعانستانداعى جاعدايدى دامىتۋعا جانە ۇقشۇ مۇشە مەملەكەتتەردىڭ وسى باعىتتاعى بىرلەسكەن ءىس-قيمىلدارىنا ەرەكشە نازار اۋدارىلدى»، – دەلىنگەن سىرتقى ىستەر مينيسترلىگىنىڭ باسپا ءسوز قىزمەتىنىڭ حابارلاماسىندا.
دۋشانبەدەگى كەزدەسۋدە پرەزيدەنت قاسىم-جومارت توقايەۆتىڭ ۇقشۇ اياسىندا جاڭا ينستيتۋت – ۇقشۇ باس حاتشىسىنىڭ بىتىمگەرشىلىك ماسەلەلەرى جونىندەگى ارنايى وكىلىن قۇرۋ تۋرالى باستاماسى قولداۋ تاپتى. قاتىسۋشىلار ۇيىمعا مۇشە مەملەكەتتەر باسشىلارىنىڭ ءتيىستى شەشىمىنىڭ جوباسىن كەلىستى.
ءىس-شارا قورىتىندىسى بويىنشا، 2021 جىلعى 16 قىركۇيەكتە دۋشانبەدە ۇقشۇ ۇجىمدىق قاۋىپسىزدىك كەڭەسىنىڭ سەسسياسىنا شىعارىلاتىن جوبالار مەن باسقا دا قۇجاتتار ماقۇلداندى. ولاردىڭ ىشىندە ۇجىمدىق قاۋىپسىزدىك كەڭەسىنىڭ دەكلاراسياسى، ۇيىمنىڭ قورعالعان مۋلتيسەرۆيستىك بايلانىس جەلىسىنىڭ سحەماسى تۋرالى ۇقشۇ ۇجىمدىق قاۋىپسىزدىك كەڭەسى شەشىمدەرىنىڭ جوبالارى، ۇقشۇ اسكەري-ەكونوميكالىق ىنتىماقتاستىق جونىندەگى مەملەكەتارالىق كوميسسياسىنىڭ ءتوراعاسى، سونداي-اق اسكەري جانە اسكەري-تەحنيكالىق سيپاتتاعى ماسەلەلەر بويىنشا باسقا دا قۇجاتتار بار.
سىرتقى ساياسي ۆەدومستۆولاردىڭ باسشىلارى ءبىرقاتار ساياسي مالىمدەمەلەر قابىلدادى، سونىڭ ىشىندە تاياۋ شىعىس پەن سولتۇستىك افريكاداعى داعدارىستىق جاعدايلاردى رەتتەۋ جونىندەگى ۇجىمدىق كۇش-جىگەر، اۋعانستانداعى جاعداي تۋرالى، بۇۇ جارعىسىنىڭ قاعيداتتارىنا ادالدىقتى راستاۋ تۋرالى، قازاقستان باستاماشىلىق ەتكەن اقپاراتتىق قاۋىپسىزدىك سالاسىنداعى بىرلەسكەن كۇش-جىگەر تۋرالى.
ۇقشۇ فورماتىنداعى بيولوگيالىق قاۋىپسىزدىك ماسەلەلەرى جونىندەگى قۇجاتتار قارالىپ، كەلىسىلدى. اتاپ ايتقاندا، 2002 جىلعى 7 قازانداعى ۇقشۇ جارعىسىنا وزگەرىستەر ەنگىزۋ تۋرالى ءتورتىنشى حاتتامانىڭ جانە «ۇقشۇ قاۋىپسىزدىك كەڭەستەرى حاتشىلارىنىڭ كوميتەتى تۋرالى ەرەجەگە وزگەرىستەر ەنگىزۋ تۋرالى» ۇقشۇ ۇقك شەشىمىنىڭ جوبالارى ماقۇلداندى، ۇقشۇ مۇشە مەملەكەتتەردىڭ بيولوگيالىق قاۋىپسىزدىك ماسەلەلەرى جونىندەگى ۋاكىلەتتى ورگاندارىنىڭ ۇيلەستىرۋ كەڭەسىن قۇرۋ تۋرالى ۇقشۇ قكحك شەشىمىنە قول قويىلدى.
ۇقشۇ مۇشە مەملەكەتتەردىڭ قورعانىس ۆەدومستۆولارىنىڭ باسشىلارى اسكەري كوميتەت تۋرالى ەرەجەگە وزگەرىستەر ەنگىزۋگە، مەديسينالىق قامتاماسىز ەتۋ جانە ۇيىم ەلدەرى ءۇشىن مەديسينالىق جانە فارماسيەۆتيكالىق ماماندىقتار بويىنشا اسكەري كادرلار دايارلاۋ پروبلەمالارىن زەرتتەۋ سالاسىنداعى بازالىق عىلىمي-زەرتتەۋ ۇيىمدارىن بەكىتۋگە، اسكەري كادرلاردى بىرلەسكەن دايارلاۋ جۇيەسىندەگى اسكەري وقۋ ورىندارىنىڭ ءوزارا ءىس-قيمىل ءتارتىبى جونىندەگى ۇسىنىمداردى، ۇقشۇ قورعانىس مينيسترلەرى كەڭەسىنىڭ جانىنداعى اسكەري كادرلاردى بىرلەسكەن دايارلاۋدى ۇيلەستىرۋ جونىندەگى جۇمىس توبى قۇرامىن بەكىتۋگە بايلانىستى ءبىرقاتار قۇجاتتاردى ماقۇلدادى.
ۇقشۇ 2002 جىلى قۇرىلعان حالىقارالىق وڭىرلىك ۇيىم. قۇرامىنا قازاقستانمەن قاتار ارمەنيا، بەلارۋس، قىرعىزستان، رەسەي جانە تاجىكستان كىرەدى.
