كوروناۆيرۋسپەن اۋىرىپ جازىلعانداردىڭ اراسىندا التى ايعا دەيىن ىندەتتىڭ سالدارىنان ايىعا المايتىندار بولادى.
بۇگىن وڭىرلىك كوممۋنيكاسيالار قىزمەتىنىڭ الاڭىندا وتكەن «پوستكوۆيدتى وڭالتۋ جانە مەديسينالىق كۇتىم تۋرالى» ونلاين باسپاسوز-كونفەرەنسياسىندا الماتى قالاسى قوعامدىق دەنساۋلىق باسقارماسىنىڭ №5 قالالىق كلينيكالىق اۋرۋحاناسىنىڭ ينفەكسيونيست دارىگەرى ولگا انتيپوۆا ىندەتتىڭ سالدارى تۋرالى جان-جاقتى تۇسىنىك بەردى، دەپ حابارلايدى Almaty-akshamy.kz ءتىلشىسى.
«كوروناۆيرۋس ينفەكسياسىنىڭ سيمپتومسىز وتەتىن، جەڭىل، ورتاشا جانە اۋىر ءتۇرى بارىن ءبارىمىز بىلەمىز. ءبىراق بۇل جەڭىل ءتۇرىنىڭ سالدارى بولمايدى دەگەن ءسوز ەمەس. ءار ادامنىڭ اعزاسى ءار ءتۇرلى بولعاندىقتان، ۆيرۋستىڭ سالدارى دا تۇرلىشە بولۋى مۇمكىن. الايدا كۆي-دىڭ جالپى سالدارى رەتىندە پاسيەنتتەردىڭ 30 پايىزىندا كەزدەسەتىن قان تامىرلارى جۇيەسىنىڭ زاقىمدانۋى، ۇيقىنىڭ بۇزىلۋى، شارشاڭقىلىق، تەرشەڭدىكتى ايتا الامىن. اۋىرىپ جازىلعانداردىڭ كوبى «تاڭەرتەڭ ۇيقىدان ويانعاندا دەمالىپ ەمەس، شارشاپ تۇراتىن بولدىم» دەپ شاعىمدانىپ جاتادى. مۇنىڭ سەبەبى ينفەكسيانىڭ اسەرى بولىپ وتىر، دەنى ساۋ ادامنىڭ ءوزى كوروناۆيرۋس جۇقتىرعان كەزدە، زاقىمدالماعان ءبىر دە ءبىر ورگانى قالمايدى. ال سوزىلمالى اۋرۋلارى بار ادام كوۆيدكە شالدىققاندا، سول اۋرۋى ودان ءارى اسقىنىپ كەتەدى. ءبىرىنشى كەزەكتە قان تامىرلارى زاقىمدالىپ، قاننىڭ ۇيۋى وزگەرىسكە ۇشىرايدى. ىندەتتەن جازىلعان سوڭ بىرەۋلەر ءبىر اپتادا اۋىرعانىن ۇمىتىپ كەتىپ جاتسا، ەكىنشىلەرى جارتى جىلعا دەيىن سالدارىمەن كۇرەسىپ جۇرەدى»، - دەيدى ينفەكسيونيست دارىگەر.