ۇقك قىلمىستىق توپتىڭ جولىن كەستى

ارنايى وپەراسيا ناتيجەسىندە 7 ادام ۇستالدى.

2022 جىلعى 17 قاراشادا ۇلتتىق قاۋىپسىزدىك كوميتەتى پروكۋراتۋرانىڭ كومەگىمەن وسى جىلدىڭ 20 قاراشاسىندا جاپپاي تارتىپسىزدىكتەردى جوسپارلاپ، ۇيىمداستىرماقشى بولعان قىلمىستىق توپتىڭ جولىن كەستى، دەپ حابارلايدى Almaty-akshamy.kz.

«ق ر قىلمىستىق كودەكسىنىڭ 179-بابىنىڭ 2-بولىگى جانە 272-بابىنىڭ 1-بولىگى بويىنشا تەرگەۋ باستالدى. ۇستالعانداردىڭ تۇرعىلىقتى جەرى بويىنشا زاتتاي دالەلدەمەلەر تاركىلەندى»،- دەلىنگەن ۇقك حابارلاماسىندا.

پروكۋراتۋرا سانكسياسىمەن ولاردىڭ جاپپاي تارتىپسىزدىكتەر ۇيىمداستىرۋعا، مەملەكەتتىك جانە قۇقىق قورعاۋ ورگاندارىنىڭ اكىمشىلىك عيماراتتارىنا، تىرشىلىكتى قامتاماسىز ەتۋ وبەكتىلەرىنە قارۋ مەن تۇتاندىرعىش قوسپالاردى قولدانۋ ارقىلى شابۋىل جاساۋعا دايىندالعاندارى قۇجاتتالعان.

توپتىڭ ءاربىر مۇشەسىنىڭ ءرولى ناقتى بولىنگەن، قىلمىستىق جوسپارلار جاسىرىن شارالارىن ساقتاي وتىرىپ، تۇراقتى كەزدەسۋلەر بارىسىندا تالقىلاندى.
توپ مۇشەلەرى «بوتەلكە لاقتىرعىش» دەپ اتالاتىن جابدىقتار جاساپ، ولاردىڭ كومەگىمەن «مولوتوۆ كوكتەيلدەرىن» لاقتىرا وتىرىپ، قۇقىق قورعاۋ ورگاندارى قىزمەتكەرلەرىن جويۋدى جوسپارلاعان.

جاسىرىن ورىندار ۇيىمداستىرىپ، وعان قىلمىس جاساۋعا ارنالعان قۇرالدار – كالاشنيكوۆ اۆتوماتى، ويىق ۇڭعىلى «مەركەل» مىلتىعى، ەكى تەگىس ۇڭعىلى كەسىلگەن مىلتىق، وق-دارىلەر، «مولوتوۆ كوكتەيلدەرىنە» ارنالعان سۇيىقتىقتىعى بوتەلكەلەر، «بوتەلكە لاقتىرعىشتار»، بەنزين قۇيىلعان كانيسترالار، راسيالار ساقتاعان.

كۇدىكتىلەر ق ر قپق 128-بابىنا سايكەس ۇستالىپ، ۋاقىتشا ۇستاۋ يزولياتورىنا قامالدى.

وزگە مالىمەتتەر قازاقستان رەسپۋبليكاسى قپق 201-بابىنا سايكەس جاريالاۋعا جاتپايدى.