قاڭتار وقيعاسى بويىنشا 5 مىڭنان استام قىلمىستىق ءىس قوزعالدى.
ۇلتتىق قاۋىپسىزدىك كوميتەتى «قاڭتار ساباقتارى» دەرەكتى ءفيلمىن جاريالادى، دەپ حابارلايدى Almaty-akshamy.kz.
كۋاگەرلەر ماڭعىستاۋداعى وقيعالار قالاي باستالعانىن جانە جاپپاي تارتىپسىزدىكتى توقتاتۋ ءۇشىن قانداي شارالار اتقارىلعانىن ايتىپ بەردى.
الاڭعا جينالعانىن حالىقتىڭ پسيحولوگياسىن زەرتتەۋگە تۋرا كەلدى.
وبلىستىق ءماسليحات دەپۋتاتى ايات سۇگىربايدىڭ ايتۋىنشا، ماڭعىستاۋداعى حالىقتى تاراتۋعا تۋىستىق قارىم-قاتىناس تا كومەكتەستى.
«ءبىز الاڭدا قانداي ۇجىمدار بار؟ ولاردىڭ كوشباسشىلارى كىم؟ كىمدەردىڭ ىقپالى جۇرەدى؟ وسىنىڭ ءبارىن تالداۋعا كىرىستىك. سوسىن ءوڭىرىمىز قازاقي بولعاننان كەيىن اعايىن-تۋما، قۇدا-جەكجات دەگەن سياقتى قارىم-قاتىناسىمىز جاقسى ءرول ويناپ كەتتى. سەبەبى قارعا تامىرلاس قازاقپىز عوي. اعايىن-تۋمامىز بار، باسقامىز بار. ءبىر رۋدىڭ ىشىندە سىيلايتىن اقساقالدارىمىز بار. سول كىسىلەرگە قولقا سالدىق، ەشكىمنىڭ سويىلىن سوقپايمىز، ەشقانداي ساياسي توپتاردىڭ مۇددەسىنە جۇمىس جاسامايمىز، ءبىر عانا مۇددەمىز بار، ول – ەلدىڭ بىرلىگى دەپ ايتتىق. دۇنيە-مۇلىك بۇزىلماۋى كەرەك دەگەن ماقسات ۇستاندىق»، - دەيدى سۇگىرباي.
ماڭعىستاۋلىقتار بىرنەشە كۇننەن كەيىن تارادى.
الايدا ەلدەگى جاعداي تىنىشتالعان جوق. گازدان باستالعان تولقۋ رەسپۋبليكانىڭ جارتىسىنا تاراپ كەتتى.
باس پروكۋراتۋرانىڭ مالىمەتىنە سايكەس، وسى ۋاقىتقا دەيىن قاڭتار وقيعاسى بويىنشا 5 مىڭنان استام قىلمىستىق ءىس قوزعالدى.
فيلمدە زارداپ شەككەن پوليسەيلەر سوققىعا قالاي جىعىلعانىن دا ايتىپ بەردى. قازا تاپقان ءتارتىپ ساقشىلاردىڭ تۋعان-تۋىستارى سۇحبات بەردى.
ال پروكۋرورلار تەرگەۋ شارالارىمەن تانىستىردى.