2025 جىلعى ءساۋىر ايىندا ۇلتتىق قاۋىپسىزدىك كوميتەتى پروكۋراتۋرا ورگاندارىمەن بىرلەسىپ، استانا قالاسى مەن اباي، اقتوبە جانە تۇركىستان وبلىستارىندا ءدىني راديكالداردىڭ زاڭعا قايشى ارەكەتتەرىنىڭ جولىن كەستى.
تەرروريزمدى ناسيحاتتادى جانە ءدىني الاۋىزدىقتى قوزدىردى دەگەن كۇدىكپەن ءتورت قازاقستان ازاماتى ۇستالدى. ۇستالعانداردىڭ ءبىرى بۇرىن سوتتى بولعان. ولار الەۋمەتتىك جەلىلەر ارقىلى زاڭسىز ارەكەتتەر جۇرگىزگەن، دەپ حابارلايدى aqshamnews.kz.
تۇرعىلىقتى جەرلەرىن ءتىنتۋ بارىسىندا زاتتاي دالەلدەمەلەر تاركىلەندى.
اتالعان فاكتىلەر بويىنشا قىلمىستىق كودەكستىڭ 174-بابى (الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىقتى قوزدىرۋ) جانە 256-بابى (تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ) بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە.
قىلمىستىق-پروسەستىك كودەكستىڭ 201-بابى 1-بولىگىنە سايكەس، تەرگەۋ مۇددەسىنە بايلانىستى وزگە اقپارات جاريا ەتۋگە جاتپايدى.
سونىمەن قاتار، بۇرىن تەرگەلگەن ىستەر بويىنشا سوت اقتوبە، قاراعاندى جانە تۇركىستان وبلىستارىنىڭ ءۇش تۇرعىنىنا قاتىستى ايىپتاۋ ۇكىمىن شىعاردى. ولار الەۋمەتتىك جەلىلەردە جانە ءوز ورتاسىندا تەرروريزم مەن ءدىني ەكسترەميزم يدەولوگياسىن تاراتقانى ءۇشىن جاۋاپقا تارتىلدى.