قوعامدا ءجيى كەزدەسەتىن، ءبىراق قۇقىقتىق سالدارى اۋىر ارەكەتتەردىڭ ءبىرى — سوتتا جالعان كۋالىك بەرۋ. بۇل تۋرالى زاڭگەر قۋات اۋعانبەك پىكىر ءبىلدىرىپ، مۇنداي ارەكەتتىڭ سالدارىنا جۇرتتىڭ نازارىن اۋداردى. تولىعىراق اqshamnews.kz ءتىلشىسىنىڭ ماتەريالىندا.
"جالعان كۋالىك بەرۋ — قىلمىس"
زاڭگەردىڭ ايتۋىنشا، سوت تەرگەۋى بارىسىندا شىندىققا جاناسپايتىن، وتىرىك اقپارات بەرۋ — قازاقستان رەسپۋبليكاسىنىڭ قىلمىستىق كودەكسىندە ناقتى جازالاناتىن ارەكەت.
"ق ر قك-نىڭ 419-بابى بويىنشا، قىلمىستىق ءىستى تەرگەۋ نەمەسە سوت تالقىلاۋى كەزىندە جالعان كۋالىك بەرگەن ادام 2000 ايلىق ەسەپتىك كورسەتكىشكە دەيىنگى مولشەردە ايىپپۇل تولەيدى نەمەسە تۇزەتۋ جۇمىستارىنا تارتىلادى. كەي جاعدايدا باس بوستاندىعىنان ايىرۋ جازاسى دا قاراستىرىلادى. ەگەر جالعان كۋالىك اۋىر نەمەسە اسا اۋىر قىلمىستى جاسىرۋ ءۇشىن بەرىلسە، وندا جازا ءتىپتى قاتايادى"، – دەيدى قۋات اۋعانبەك.
كۋا بولۋ — قۇقىق قانا ەمەس، جاۋاپكەرشىلىك
زاڭگەر جالعان كۋالىك بەرۋدىڭ ادام تاعدىرىن بۇزۋى مۇمكىن ەكەنىن ەسكە سالىپ وتىر. ونىڭ ايتۋىنشا، شىندىقتى بۇرمالاۋ ادىلەتتىلىككە كەرى اسەر ەتەدى.
"ءاربىر ازامات سوتقا شاقىرىلىپ، كۋا رەتىندە جاۋاپ بەرگەندە، تەك شىندىقتى ايتۋعا مىندەتتى. بۇل مورالدىق جانە قۇقىقتىق جاۋاپكەرشىلىك. سەبەبى جالعان كۋالىك بىرەۋدىڭ تاعدىرىن وزگەرتىپ جىبەرۋى مۇمكىن. كىناسىز ادام جازاعا تارتىلىپ، ال قىلمىسكەر جاۋاپكەرشىلىكتەن جالتارىپ كەتۋى ىقتيمال"، – دەيدى زاڭگەر.
كەيبىر جاعدايلار جازادان بوساتۋى مۇمكىن
سونىمەن قاتار قۋات اۋعانبەك زاڭدا جالعان كۋالىك ءۇشىن كەيبىر ەرەكشە جاعدايلاردا ادامدى قىلمىستىق جاۋاپكەرشىلىكتەن بوساتۋعا مۇمكىندىك بار ەكەنىن دە ايتتى.
"ەگەر ادام جالعان كۋالىك بەرگەن سوڭ، بۇل ارەكەتتى ءوز ەركىمەن اشكەرەلەپ، شىندىقتى ايتسا، سوت ونىڭ ارەكەتىن جەڭىلدەتەتىن جاعداي رەتىندە قاراي الادى. بۇل — زاڭدا كوزدەلگەن مۇمكىندىك"، – دەدى ول.