2 ميلليارد دوزا ۆاكسينا الدى
ءۇندىستان تۇرعىندارى كوروناۆيرۋستىق ينفەكسياعا قارسى الەمدەگى ەڭ ءىرى ۆاكسيناسيا باعدارلاماسى كەزىندە 2 ميلليارد دوزا ۆاكسينا الدى. بۇل جەتىستىكپەن حالىقتى پرەمەر-مينيستر قۇتتىقتادى، دەپ حابارلايدى Almaty-akshamy.kz.
COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ مالىمەتىنشە، ءۇندىستاندا 18 اي بۇرىن كوروناۆيرۋسقا قارسى جالپىۇلتتىق تەگىن ۆاكسيناسيا ناۋقانى باستالدى. قازىرگى ۋاقىتتا ەرەسەك تۇرعىنداردىڭ 98%-ى ۆاكسينانىڭ كەم دەگەندە ءبىر دوزاسىن الدى، 90%-ى تولىق ەگىلدى. ۆاكسينالاردى 12 مەن 18 جاس ارالىعىنداعى ۇندىستەردىڭ 80%-دان استامى الدى. ۆاكسيناسيالانعان بالالاردىڭ سانى ءۇندىستاندا 50 ميلليوننان استى.
«ەۋروپادا جۇقتىرۋدىڭ كەزەكتى ءوسۋى جالعاسۋدا. ءقازىر ەڭ جوعارى كورسەتكىشتەر گەرمانيادا، وندا كۇنىنە 140 مىڭنان استام جاعداي تىركەلەدى، بۇل - ەلدەگى ناۋرىز ايىنىڭ سوڭىنان بەرگى ەڭ جوعارى كورسەتكىش. سونىمەن قاتار، وتكەن اپتادا ايماقتا اۋرۋشاڭدىق بويىنشا ءبىرىنشى ورىن العان فرانسيادا ءقازىر ازداپ تومەندەۋ بايقالادى - كوۆيد 120 مىڭ تۇرعىندا تىركەلگەن. يتاليادا كورسەتكىشتەر شامامەن بىردەي دەڭگەيدە»، - دەپ جازدى كوميسسيا.
لاتىن امەريكاسى ەلدەرىندە ينفەكسيانىڭ تارالۋ قارقىنى تۇراقتاندى. ماسەلەن، مەكسيكادا وتكەن اپتادا، الدىڭعى ۇقساس كەزەڭدەگىدەي، كۇنىنە 30 مىڭعا جۋىق جاعداي تىركەلدى، بۇل اقپان ايىنىڭ دەڭگەيىنە سايكەس كەلەدى. ەڭ جوعارى كورسەتكىشتەر برازيليادا ءالى دە بار، وندا كوۆيد شامامەن 70 مىڭ ادامنان انىقتالعان. ينفەكسيا جۇقتىرۋدىڭ وسى دەڭگەيى ءۇش اپتاعا سوزىلۋدا.
«ءبىرقاتار ازيا ەلدەرىنىڭ بيلىگى كوۆيدتىڭ جاڭا، جەتىنشى تولقىنى تۋرالى ايتۋدا. وتكەن اپتامەن سالىستىرعاندا ءوسىم ەكى ەسەگە جۋىق بولدى. وڭتۇستىك كورەيادا كۇرت ءوسۋ بايقالادى، وندا كۇن سايىن ينفەكسيا جۇقتىرۋدىڭ 40 مىڭ جاعدايى تىركەلۋدە. سونىمەن قاتار، ءۇندىستاندا ءوسۋ توقتاپ قالدى - ەلدە ەكى اپتا قاتارىنان 20 مىڭعا جۋىق تۇرعىن كوروناۆيۋرس ينفەكسياسىن جۇقتىردى»، - دەلىنگەن حابارلامادا.