بۇگىن نيۋ-دەليدە جاۋىن سەلدەتىپ، شاھاردا كولىك قوزعالىسى قيىندادى. ۇشاقتار دا ۇشپادى. ءبىراق ءبىرازدان بەرى ىستىقتان زارەزاپ بولعان تۇرعىندارى نوسەردىڭ قۇيعانىن ريزا. ال اسسام شتاتىندا شەلەكتەپ قۇيعان جاڭبىر سوڭى تاسقىنعا ۇلاسىپ، 18 ادام كوز جۇمدى. 800 مىڭنان اسا تۇرعىن باسپاناسىنان ايىرىلدى. ايماقتىڭ 31 وكرۋگىندەگى ەگىستىك القاپتار سولىپ قالدى، دەپ حابارلايدى Almaty-akshamy.kz 24.kz-كە سىلتەمە جاساپ.
داتتا سەناپاتي، تۇرعىن:- سۋ اياق استىنان تاسىپ، قولىمىزعا ىلىنگەن دۇنيە-مۇلكىمىزدى عانا الىپ شىقتىق. قالعانى سۋ استىندا قالدى. تاماق جوق قارنىمىز اش. نە ىستەيتىنىمىزدى بىلمەيمىز.
بانگلادەشتە تاسقىننان ونداعان مىڭ ادام باسپاناسىز قالدى
ءۇندىستانعا كورشى بانگلادەشتىڭ سيلحەت ايماعىندا دا جاۋىن سەلدەتىپ، كوپ ەلدى مەكەندى سۋ باسىپ جاتىر. جۇزدەن استام تاس جولدى سۋ بۇزىپ، ونداعان اۋدان ءبولىنىپ قالدى. مىڭداعان ادام باسپاناسىنان ايىرىلدى. ءوڭىردىڭ ينفراقۇرىلىمىنا وراسان زور شىعىن كەلگەن. سۋ ءالى قايتپاعاندىقتان اپاتتى اۋداندارعا كومەك جەتكىزۋ قيىنعا سوعىپ وتىر.
- اۋىلىمىز ەڭىستە ورنالاسقاندىقتان تاسقىننان قاتتى زارداپ شەكتىك. ۇيلەرىمىز قيراپ، ەگىستىگىمىزدىڭ ءبارىن شايىپ كەتتى.
اقش: ەلدە جوق ىستىق
ال اقش-تىڭ سولتۇستىك-شىعىسىندا كۇن ادەتتەگىدەن الدەقايدا ىسىپ كەتتى. ۆاشينگتوننان باستاپ نيۋ-يورككە دەيىن ونداعان قالادا سىناپ باعاناسى 35 گرادۋستان اسقان. تۇرعىندار ىستىقتان قاشىپ، كولەڭكە تاپپاي ءجۇر. كەيبىرەۋلەر ءتىپتى سۋ بۇرقاقتارعا شومىلىپ ءماز.
- كۇن وتە ىستىق. مەنىڭ ويىمشا 38 گرادۋس شىعار. شىجىعان كۇننەن ءبىراز سالقىندايىق دەپ بالالارىمدى الىپ اكۆاپارككە كەلدىم. قولىمداعى پلاستماس شولمەكتى ااندا-ساندا باسىما قويىپ سالقىنداۋعا ءماجبۇرمىن.
برازيليادا قار جاۋدى
برازيليانىڭ وڭتۇستىگىندە وتكەن اپتادا كۇن سۋىتىپ، سانتا-كاتارينا شتاتىندا سىناپ باعاناسى مينۋس 5 گرادۋسقا دەيىن تومەندەدى. كەي جەرلەردە قار جاۋدى. مەكتەپتەر مەن ۋنيۆەرسيتەتتەر جابىلعان. ماماندار وتكەن اپتادا باستالعان سۋىق ءالى دە بىرنەشە كۇنگە سوزىلاتىنىن ايتادى.
فابيۋ سانتوس، ريو-دە-جانەيرو تۇرعىنى:
- ءقازىر ادەتتەن تىس ەرەكشە سۋىق بولىپ تۇر. بالا كەزىمدە بۇل ايماقتا كۇننىڭ سۋىتۋى سيرەك كەزدەسەتىن. ال ءقازىر مۇنداي اۋا رايى جيىلەدى.
كانادادا تورنادو ويران سالدى
كانادانىڭ ونتاريو پروۆينسياسىندا تورنادو ويران سالدى. تابيعات اپاتىنان 2 ادام كوز جۇمدى. تاعى بىرنەشەۋى جاراقات الدى. دۇلەي جەل تالداردى تامىرىمەن قوپارىپ، ەلەكتر باعانالارىن قۇلاتتى. پروۆينسيانىڭ 300 مىڭنان اسا تۇرعىنى جارىقسىز قالدى.