دومبىرادا ءان ايتىلىپ، حالىق اندەرى ورىندالدى
كاۋناس قالاسىنداعى ۇلى ۆيتوۆت ۋنيۆەرسيتەتىنىڭ ۇلكەن زالىندا قازاقستان مەن ليتۆا اراسىنداعى ديپلوماتيالىق قارىم-قاتىناستاردىڭ ورناعانىنا 30 جىل تولۋىنا وراي ق ر ەلشىلىگى احمەت بايتۇرسىن ۇلىنىڭ 150 جىلدىعىنا جانە روزا باعلانوۆانىڭ 100 جىلدىعىنا ارنالعان سالتاناتتى كەش وتكىزدى، دەپ حابارلايدى Almaty-akshamy.kz ءسىم باسپا ءسوز قىزمەتىنە سىلتەمە جاساپ.
ءىس-شاراعا سەيم دەپۋتاتتارى، قالا مەرياسىنىڭ، ىسكەرلىك جانە قوعامدىق توپتاردىڭ وكىلدەرى، سونداي-اق قازاقستاندىق ستۋدەنتتەر قاتىستى.
ق ر قۇرمەتتى كونسۋلى البەرتاس ميلينيس كەش قوناقتارىن مەرەيتويلارى يۋنەسكو-نىڭ ەستە قالارلىق داتالاردىڭ حالىقارالىق كۇنتىزبەسىنە ەنگەن قازاق حالقىنىڭ كورنەكتى وكىلدەرى – احمەت بايتۇرسىن ۇلى مەن روزا باعلانوۆانىڭ ءومىرى مەن شىعارماشىلىعىمەن تانىستىردى.
مەرەكەلىك كونسەرتتە قازاقستاندىق ءارتىس گۇلنيزا جۇماجانوۆا دومبىرادا قازاقتىڭ حالىق اندەرىن، ونىڭ ىشىندە روزا باعلانوۆانىڭ رەپەرتۋارىنداعى شىعارمالاردى ورىندادى.
سالتاناتتى كەش اياسىندا قازاقستاندىق ديپلوماتتار قازاقستان-ليتۆا ىنتىماقتاستىعىنىڭ وتىز جىلداعى جەتىستىكتەرى، سونداي-اق ەلىمىزدە جۇرگىزىلىپ جاتقان ساياسي جانە ەكونوميكالىق رەفورمالار تۋرالى ايتىپ بەردى.
سەيمنىڭ ەكونوميكا جونىندەگى كوميتەتىنىڭ ءتوراعاسى كازيس ستاركياۆيچيۋس ءوز سوزىندە ەكى ەلدىڭ ساۋدا-ەكونوميكالىق جانە مادەني-گۋمانيتارلىق سالالارداعى ءوزارا ءىس-قيمىلىنىڭ جوعارى دەڭگەيىن اتاپ ءوتتى
كەش قوناقتارى قازاقستان تۋرالى كوبىرەك بىلۋگە مۇمكىندىك بەرگەن ءىس-شارانى ۇيىمداستىرعانى جانە وتكىزگەنى ءۇشىن العىستارىن ءبىلدىردى.
كوپتەگەن ساۋلەت ەسكەرتكىشتەرى مەن كوپتەگەن مۇراجايلارىمەن تانىمال ليتۆانىڭ بۇرىنعى استاناسى جانە ەكىنشى ءىرى قالاسى – كاۋناس قالاسى 2022 جىلى ەۋروپانىڭ مادەني استاناسى دەپ اتالۋ قۇقىعىنا يە بولدى. جىل ىشىندە مۇندا 40-قا جۋىق فەستيۆال، 60-تان استام كورمە، 250 ورىنداۋشىلىق ونەر جانە 250-دەن استام كونسەرت وتەدى. 2023 جىلى مادەني استاناسى ماجار ۆەسپرەم، ال 2024 جىلى ەستون تارتۋ جانە نورۆەگيالىق بودو بولادى.