قازاقستاندا Umai-2023 ۇلتتىق سىيلىعىنا قاتىسۋعا ءوتىنىم قابىلداۋ باستالدى.
ايتۋلى شىعارماشىلىق تابىستارى مەن ۇزدىك جەتىستىكتەرى ءۇشىن كاسىبي شىعارماشىلىق ۇجىمدار مەن جەكەلەگەن ونەر قايراتكەرلەرىن قولداۋعا باعىتتالعان بايقاۋ وسىمەن ەكىنشى رەت وتكىزىلىپ وتىر، دەپ حابارلايدى اlmaty-akshamy.kz 24.kz-كە سىلتەمە جاساپ.
ق ر مادەنيەت جانە اقپارات مينيسترلىگىنىڭ قولداۋىمەن، بيىل سىيلىقتار مەن جالپى جۇلدە قورى ەداۋىر ۇلعايدى.
ءوتىنىم قابىلداۋ
- «تەاتر ونەرى»،
- «مۋزىكالىق-ورىنداۋشىلىق ونەر»،
- «حورەوگرافيالىق ونەر»،
- «بەينەلەۋ جانە ساندىك-قولدانبالى ونەر» ءتارىزدى ءتورت نەگىزگى نوميناسيا بويىنشا وتەدى.
«تەاتر ونەرى» نوميناسياسى بويىنشا سەگىز جۇلدە بەلگىلەنگەن:
- «وپەرا ونەرى» (وپەراداعى ەرلەر جانە ايەلدەر پارتياسىن ۇزدىك ورىنداۋ)،
- «اكتەرلىك شەبەرلىك»(درامالىق نەمەسە مۋزىكالىق-درامالىق سپەكتاكلدەگى: وپەرەتتا، ميۋزيكل، روك-وپەرا، مۋزىكالىق كومەدياداعى ۇزدىك ەر ادام جانە ۇزدىك ايەل ادام ءرولى)،
- «ۇزدىك رەجيسسۋرا» (مۋزىكالىق-درامالىق نەمەسە درامالىق سپەكتاكلدەگى رەجيسسەرلىك جۇمىس)،
- «سپەكتاكلدىڭ ۇزدىك كوركەمدىك بەزەندىرىلۋى» (كوستيۋمدەر جانە/نەمەسە دەكوراسيالار)،
- «ۇزدىك مۋزىكالىق-درامالىق سپەكتاكل»- وپەرا، درامالىق/مۋزىكالىق-درامالىق (وپەرەتتا / ميۋزيكل / روك-وپەرا / مۋزىكالىق كومەديا)،
- «ۇزدىك درامالىق سپەكتاكل / مۋزىكالىق كومەديا».
«حورەوگرافيالىق ونەر» نوميناسياسى بويىنشا التى جۇلدە بەلگىلەنگەن:
- «ۇزدىك بي ۇجىمى»(حالىقتىق، زاماناۋي نەمەسە ەسترادالىق بي ءانسامبلى)،
- «ۇزدىك زاماناۋي حورەوگرافيا سپەكتاكلى»،
- «بالەتتەگى ۇزدىك ورىنداۋشى» (بالەت ءسوليسى /ەر/ ايەل)،
- «ۇزدىك حورەوگراف»،
- «ۇزدىك كلاسسيكالىق بالەت سپەكتاكلى».
تاعى ءتورت جۇلدەنى جەڭىمپازدار «مۋزىكالىق-ورىنداۋشىلىق ونەر» نوميناسياسى بويىنشا الادى:
- «ۇزدىك ءداستۇرلى ورىنداۋشى (ءان ايتۋ)»، «ۇزدىك ءداستۇرلى ورىنداۋشى(اسپاپشى)»،
- «ۇزدىك مۋزىكالىق انسامبل» (كلاسسيكالىق)،
- «ۇزدىك مۋزىكالىق انسامبل» (حالىقتىق).
«بەينەلەۋ جانە ساندىك-قولدانبالى ونەر» نوميناسياسى بويىنشا جۇلدە «ۇزدىك ساندىك-قولدانبالى ونەر شەبەرىنە» مىناداي ساناتتار بەرىلەدى:
- قولونەر شەبەرى (زەرگەرلىك ونەر، مەتالل وڭدەۋ، ەكسپەريمەنتتىك/ارالاس تەحنيكالار)،
- قولونەر شەبەرى (اعاش وڭدەۋ، كوركەم ويۋ، كەراميكا)،
- قولونەر شەبەرى (كيىز، تەكستيل، توقىماشىلىق، بىلعارى).
«ۇزدىك بەينەلەۋ ونەرىنىڭ تۋىندىسى» ءۇشىن تاعى ءتورت سىيلىق تاعايىندالادى، اتاپ ايتقاندا:
- «ۇزدىك كەسكىندەمە شەبەرى»،
- «ۇزدىك زاماناۋي ونەر سۋرەتشىسى (پەرفورمانستار، ينستاللياسيالار، ارت-نىساندار جانە ت. ب.)،
- «ۇزدىك گرافيكا شەبەرى» جانە «ۇزدىك ءمۇسىن شەبەرى». (وسى اتالعانداردىڭ ىشىندەگى ەڭ سوڭعىسى العاش رەت پايدا بولدى، كوركەم سۋرەت / گرافيكا بويىنشا وتكەن جىلعى ءبىر جۇلدە بيىل ەكى جەكە سىيلىققا ءبولىندى).
بيىل «ۇزدىك بالالار سپەكتاكلى» (ەكى سىيلىق) ارنايى جۇلدەلەرمەن اتاپ وتىلەدى، سونداي-اق تاۋەلسىز ساراپتاۋ كوميسسياسىنىڭ مۇشەلەرى فيناليستەردىڭ اراسىنان «جىل جاڭالىعىن» (ساحنالىق ونەر سالاسىندا) (ەكى سىيلىق) تاڭدايدى. شىعارماشىلىقتا جاڭاشىل بەتبۇرىس جاساعان جانە قازاقستاندا، سونداي-اق شەتەلدە تەاتر سالاسىنداعى وزدەرىنىڭ جارقىن بىرەگەي جەتىستىكتەرى ارقىلى تانىمال بولعان، جاسى 40-تان اسپاعان ساحنا ونەرىنىڭ شەبەرلەرى «جىل جاڭالىعى» جۇلدەسىنە ۇمىتكەر بولا الادى.
ايتا كەتۋ كەرەك، ۇجىمدار مەن ورىنداۋشىلار 2021 جىلدىڭ قىركۇيەگىنەن باستاپ 2023 جىلدىڭ شىلدەسىنە دەيىنگى تەاتر (كونسەرتتىك) ماۋسىمىندا اتقارعان جۇمىستارى ءۇشىن Umai-2023 سىيلىعىنىڭ نومينانتتارى بولا الادى. جەكەلەگەن ونەر قايراتكەرلەرى (وپەرا سوليستەرى، دراما اكتەرلەرى، رەجيسسەرلەر، سۋرەتشى سەنوگرافتار، كوستيۋمدەر بويىنشا سۋرەتشىلەر، بالەت سوليستەرى، حورەگرافتار، مۋزىكالىق ورىنداۋشىلار) ەكى جىلدان اسپايتىن مەرزىمدە، ياعني 2021 جىلدان 2023 جىلعا دەيىن ورىنداعان رولدەرى/پارتيالارى/شىعارماشىلىق جۇمىستارى/مۋزىكالىق باعدارلامالارى ءۇشىن بايگەگە تۇسەدى. سۋرەتشىلەر مەن ساندىك-قولدانبالى ونەر شەبەرلەرى دە 2021 جىلدان ەرتە ەمەس كەزەڭدە جاسالعان جۇمىستارى ءۇشىن ۇمىتكەر بولا الادى. وتىنىمدەردى قابىلداۋ 2023 جىلدىڭ 5 جەلتوقسانىندا اياقتالادى. سىيلىققا يننوۆاسيالىق شىعارماشىلىق قىزمەتتەرى – ەلدىڭ مادەنيەتى مەن ونەرىنىڭ دامۋىنا ىقپال ەتەتىن قازاقستان رەسپۋبليكاسىنىڭ ازاماتتارى ۇمىتكەر بولا الادى. نومينانتتاردى رەسپۋبليكالىق، وڭىرلىك نەمەسە جەرگىلىكتى بيلىك ورگاندارى، مادەنيەت ۇيىمدارى، ۇكىمەتتىك ەمەس ۇيىمدار مەن قوعامدىق بىرلەستىكتەر، شىعارماشىلىق وداقتار مەن قاۋىمداستىقتار، مادەنيەت پەن ونەر سالاسىنداعى وقۋ ورىندارى، سونداي-اق جەكە تۇلعالار ۇسىنا الادى. تاۋەلسىز ساراپتاۋ كوميسسياسىنىڭ قۇرامىنا ەنەتىن قازاقستاننىڭ تانىمال مادەنيەت جانە ونەر قايراتكەرلەرى ۇزدىكتەردىڭ ۇزدىگىن انىقتايتىن بولادى. Umai-2023 ۇلتتىق سىيلىعى لاۋرەاتتارىن سالتاناتتى ماراپاتتاۋ ءراسىمى 2023 جىلدىڭ 22 جەلتوقسانىندا «استانا وپەرا» تەاترىندا وتەدى. Umai سىيلىعى جاس مادەنيەت جانە ونەر قايراتكەرلەرىنە جەتىستىككە تالپىنۋعا سەرپىن بەرەدى. سيمۆوليكالىق مانگە يە سىيلىقتىڭ اتاۋى ءتۇپ-تامىرىمىزعا قايتا ورالتىپ، تۋعان جەرگە، تابيعاتقا قامقورلىقپەن قاراۋعا شاقىرادى جانە تەرەڭ فيلوسوفيالىق تاقىرىپتارعا ۇندەيدى. وتىنىمدەردى umaiastanaopera2023@gmail.com پوشتاسىنا جىبەرۋگە بولادى.