اقىن-جازۋشىلار حالىقتىڭ جوعىن جوقتاۋشى، مۇڭىن مۇڭداۋشى. مۇنداي پىكىردى اقىن، قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ءبىلدىردى، دەپ حابارلايدى almaty-akshamy.kz قازاقپارات تىلشىسىنە سىلتەمە جاساپ.
ونىڭ ايتۋىنشا، شەرۋگە شىعۋدى، ونى وتكىزۋدى جانە قابىلداۋدى ءبىر جۇيەگە كەلتىرۋ كەرەك.
«قوعامدى تولقىتپاي، قوعامنىڭ ىنتىماق- بىرلىگىن ساقتاۋ وتە قاجەت. جاستارعا ايتارىم دا سول. ەڭ الدىمەن مادەنيەتتىلىك كەرەك. ءتارتىپ بۇزۋ بۇل جاقسى نارسە ەمەس. قوعامنىڭ ورەسىن كوتەرمىز دەسەك، ەلىمىزدىڭ دامۋىن قالىپتاستىرامىز دەسەك ءبىز كەرى كەتپەۋىمىز كەرەك. مەن ءبىرجاقتى ايىپتاۋدان اۋلاقپىن. ەڭ باستىسى اراڭداتۋشىلارعا ەرىك بەرمەۋ كەرەك. بۇل قارسى ارەكەت تۋدىرادى. بيلىك پەن حالىق اراسىنداعى ديالوگتى بۇزادى، كوپىر سالۋدىڭ ورنىنا قيراتادى. جاڭا قابىلدانعان ۇكىمەت وسى ماسەلەنى وڭ شەشەدى دەگەن تىلەك بار»،- دەدى ول.
ۇلىقبەك ەسداۋلەت اقىن- جازۋشىلار حالىقتىڭ جوعىن جوقتاۋشى، مۇڭىن مۇڭداۋشى ەكەنىن ايتتى.
«قوعامدا قانداي سىلكىنىستەر بولسا دا، اقىن- جازۋشىلار قاشان دا حالىقتىڭ جاعىندا. حالىقتىڭ تىلەگىن، حالىقتىڭ ءسوزىن سويلەۋ پارىزى مەن مىندەتى. ءبىز بولىپ جاتقان وقيعالارعا قاتتى الاڭداۋلىمىز. ءبارى بەيبىت جولمەن شەشىلىپ، حالىقتىڭ تالاپ، تىلەگى ورىندالادى دەگەن ۇمىتتەمىز. اقىن- جازۋشىلار حالىقتىڭ جوعىن جوقتاۋشى، مۇڭىن مۇڭداۋشى. ءبىز حالىقپەن بىرگەمىز»- دەدى اقىن.