بۇگىن پارلامەنت ءماجىلىسىنىڭ جالپى وتىرىسىندا دەپۋتاتتار گاز ماسەلەسىنە قاتىستى پرەمەر-مينيستردىڭ مىندەتىن اتقارۋشى ءاليحان سمايىلوۆتىڭ اتىنا ساۋال جولدادى، دەپ حابارلايدى almaty-akshamy.kz قازاقپاراتقا سىلتەمە جاساپ.
«وسى ساۋالىمىز ماڭعىستاۋ وبلىسىنىڭ تۇتىنۋشىلارىنا ارنالعان سۇيىتىلعان مۇناي-گازىنا باعانىڭ كوپ كوتەرىلۋىنە بايلانىستى. بۇل ازاماتتاردىڭ نارازىلىعىن تۋعىزىپ، ايماقتا الەۋمەتتىك شيەلەنىستى كۇشەيتىپ جىبەرگەنى بەلگىلى. جاعداي مەملەكەت باسشىسى قاسىم-جومارت كەمەل ۇلى توقايەۆتىڭ جەكە باقىلاۋىنا الىندى. پرەزيدەنتتىڭ تاپسىرماسى بويىنشا ۇكىمەتتىك كوميسسيا جۇمىس ىستەدى، ول قالىپتاسقان جاعدايدىڭ وڭتايلى شەشىمىن تاپتى. پروبلەما جاڭا جىلدىڭ العاشقى كۇندەرى شيەلەنىسكەنىنە قاراماستان، ونىڭ العىشارتتارى بۇدان دا بۇرىنىراق بەلگىلى بولا باستاعانىن اتاپ ءوتۋ كەرەك. سۇيىتىلعان گاز نارىعىنا، وتىننىڭ تاپشىلىعىنا، سالاداعى باعا بەلگىلەۋگە قاتىستى ماسەلەلەردى بىرنەشە رەت ءماجىلىس دەپۋتاتتارى دا كوتەرگەن ەدى»، - دەپ توقتالدى دەپۋتات ب. سماعۇل جالپى وتىرىستا
وسى ورايدا ول اتالعان ماسەلەنىڭ ءبىرقاتارى رەتتەلسە دە، الايدا ءبىرقاتارى شەشىمىن تاپپاعانىن اتاپ ءوتتى.
«بىرىنشىدەن، ەنەرگەتيكا مينيسترلىگى باعانىڭ بۇلايشا ءوسۋىن 2022 جىلعى 1 قاڭتاردان باستاپ سۇيىتىلعان گازدىڭ 100 پايىز ەلەكتروندى ساۋدا الاڭى ارقىلى ساتىلاتىنىن ءتۇسىندىردى. ءۇش جىل ىشىندە (زاڭ كۇشىنە ەنگەننەن كەيىن) ساۋدا الاڭىندا نارىقتىق تەتىكتەر قالىپتاسىپ ۇلگەرمەدى. ساۋدا-ساتتىقتى ەنەرگەتيكا مينيسترلىگى «قولمەن باسقارۋ» رەجيمىنە وتكىزدى. بۇل «كنوپكالى» اۋكسيون دەپ اتالاتىن جاعدايعا جەتكىزدى. بۇل ەلەكتروندى الاڭدار تەتىگىنىڭ بەدەلىن كەتىرىپ، ناتيجەسىنە قول جەتكىزبەدى. ءسويتىپ، بۇگىنگى كۇنى داعداردىستىق جاعدايعا اكەلىپ تىرەپ وتىر»، - دەدى دەپۋتات.
سونىمەن قاتار، ول ەلىمىزدە سۇيىتىلعان گاز ساتۋدىڭ ءبىرىڭعاي ۇلتتىق نارىعى قالىپتاسپاعانىن ايتتى. ونىڭ ەسەسىنە، سۇيىتىلعان گاز تاپشىلىعى ورىن الدى، كورسەتكىشى 2021 جىلى 15 پايىزعا جەتتى.
«كوتەرمە ساۋدا نارىعىنداعى الىپساتارلىقتى جويۋ جانە ساۋدا-ساتتىقتىڭ اشىقتىعىن ارتتىرۋ ماقساتىمەن وتكەن جىلى پارلامەنت بيرجالىق ساۋدانى ۇيىمداستىرۋ جونىندە كەيبىر زاڭ اكتىلەرىنە وزگەرىستەر مەن تولىقتىرۋلار ەنگىزدى. زاڭ كۇشىنە ەندى، الايدا ەنەرگەتيكا مينيسترلىگى سۇيىتىلعان گازدى وتكىزۋدىڭ جاڭا ەرەجەلەرىن ءالى كۇنگە دەيىن جاساعان جوق. وسى وزەكتى ماسەلەلەردى رەتتەمەيىنشە، بىزدە باعانىڭ شارىقتاۋى سۇيىتىلعان گازعا عانا ەمەس، تاۋارلاردىڭ، جۇمىستاردىڭ جانە كورسەتىلەتىن قىزمەتتەردىڭ كوپتەگەن تۇرىنەن بايقالاتىن بولادى. تۇپتەپ كەلگەندە، بۇدان قاراپايىم تۇتىنۋشى زارداپ شەگەدى»، - دەدى ول.
«ءبىزدىڭ ءبارىمىز بۇل كۇندەرى جاڭاوزەندە، اقتاۋدا بولعان وقيعالارعا كۇيزەلدىك. بارلىعىمىز تىنىشتىق پەن قوعامداعى تۇراقتىلىقتى ساقتاۋعا، ءوزارا ءتيىمدى شەشىم قابىلداۋعا جانە قاسىم-جومارت كەمەل ۇلى توقايەۆ اتاپ وتكەندەي، جاۋاپكەرشىلىكتى تانىتۋعا ءتيىستىمىز»، - دەدى ب. سماعۇل.