ۇلىبريتانيادا كونسەرۆاتيۆتى پارتيا باسشىسىن سايلاۋدىڭ سوڭعى كەزەڭى باستالدى. بۇگىننەن باستاپ پارتيانىڭ ەلدەگى 160 مىڭ مۇشەسىنە پوشتا ارقىلى بيۋللەتەن تاراتىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
ولار داۋىس بەرۋ قاعازىن 2 قىركۇيەككە دەيىن تولتىرىپ، قايتا جىبەرۋى ءتيىس. كونسەرۆاتيۆتى پارتيانىڭ كوشباسشىلىعىنا ەكى كانديدات ۇمىتكەر. ولار بۇرىنعى قارجى ءمينيسترى ريشي سۋناك پەن سىرتقى ىستەر ءمينيسترى ليز تراسس. داۋىس بەرۋشىلەردىڭ تالاپ-ۇددەسىنەن شىعۋ ءۇشىن قوس كانديدات ارا-تۇرا تىكەلەي ەفيردەگى دەباتتاردا پىكىر تالاستىرادى.
الدىڭعى پىكىرتالاستا سۋناك تراسستان ءسال وزعان ەدى. الايدا سوڭعى ساۋالناماعا سۇيەنسەك، سىرتقى ىستەر ءمينيسترىنىڭ ءباسى باسىم. جەڭىمپاز 5 قىركۇيەكتە انىقتالادى. بيلەۋشى پارتيانىڭ قاي كانديداتى جەڭسە، سول بىردەن ۇلىبريتانيانىڭ پرەمەر-مينيسترى اتاناتىنىن ايتا كەتكەن ءجون.