ەڭبەك جانە حالىقتى الەۋمەتتىك قورعاۋ مينيسترلىگى ەلىمىزدە قۇرىلاتىن ۋاقىتشا جۇمىس ورىندارىنىڭ سانىن شەكتەمەۋدى ۇسىندى. قۇزىرلى ورگان «حالىقتى جۇمىسپەن قامتۋعا جاردەمدەسۋ ماسەلەلەرى تۋرالى» بۇيرىعىنا وسىنداي وزگەرىس ەنگىزىپ، اشىق تالقىعا شىعاردى، دەپ حابارلايدى Almaty-akshamy.kz Inform.kz-كە سىلتەمە جاساپ.
ۆەدومستۆو اقپاراتىنا ساي، جۇمىس بەرۋشىلەر بازاسىنىڭ شەكتەۋلى بولۋىنا بايلانىستى ءبىرقاتار وڭىرلەردە قوعامدىق جۇمىستارمەن قامتۋ بويىنشا ماسەلە تۋىنداعان.
«2022 جىلعى I جارتىجىلدىقتىڭ قورىتىندىسى بويىنشا، تۇركىستان وبلىسىندا جوسپارلانعان 15،4 مىڭ جۇمىسسىز ادامنىڭ تەك 9،5 مىڭى عانا جۇمىسقا تارتىلعان. وسى سياقتى جىلدىق جوسپار ماڭعىستاۋ وبلىسىندا - 54،1، شىمكەنت قالاسىندا - 63،7، جامبىل وبلىسىندا - 68،6، اقمولا وبلىسىندا - 69،3، اقتوبە وبلىسىندا - 71،6، شىعىس قازاقستان وبلىسىندا - 71،9%، ال الماتى وبلىسىندا - 72 پايىزعا عانا ورىندالعان. بۇل رەتتە، جۇمىسسىز ازاماتتاردىڭ باسىم بولىگى تىركەلگەن وڭىرلەردە كوپ حالىق تۇراتىنىن اتاپ ءوتۋ كەرەك. جۇمىس ورىندارى سانىنىڭ شەكتەۋلى بولۋى جۇمىسسىزدار تاراپىنان نارازىلىق تۋدىرىپ وتىر»، - دەپ جازىلعان بۇيرىقتا.
مينيسترلىك ماسەلەنىڭ شەشىمى رەتىندە قۇرىلاتىن ۋاقىتشا جۇمىس ورىندارىنىڭ سانىن شەكتەمەۋدى ۇسىنىپ وتىر.
«بۇگىندە بارلىق وڭىرلەردە جۇمىسسىز تۇلەكتەردى جاستار پراكتيكاسىمەن قامتۋ بويىنشا جوسپارلى كورسەتكىشتەردى ورىنداي الماۋ ءقاۋىپى بار. 2022 جىلعى 1 شىلدەدەگى مالىمەت بويىنشا، جاستار پراكتيكاسىنا 9،7 مىڭ ادام جىبەرىلدى. بۇل – جىلدىق جوسپاردىڭ 38،5 پايىزى. ال، وسى ارالىقتا «العاشقى جۇمىس ورنى» جوباسى شەڭبەرىندە 1 446 ادام قامتىلدى. بۇل – جىلدىق جوسپاردىڭ 36،1 پايىزى عانا. «كۇمىس جاس» جوباسىمەن 816 ادام جۇمىس تاپتى. وسىلايشا، اتالعان باعدارلاما بويىنشا جىلدىق جوسپاردىڭ 16،3 پايىزىن عانا ورىندادىق. تومەن كورسەتكىشتەر جۇمىس بەرۋشىلەر سانىنىڭ شەكتەۋلى بولۋىنا بايلانىستى. سوندىقتان، زاڭنامادا كوزدەلگەن شەكتەۋلەردى الىپ تاستاۋ ۇسىنىلادى»، - دەپ كورسەتىلگەن قۇجاتتا.
قولدانىستاعى زاڭناماعا سايكەس، بۇگىندە قوعامدىق جۇمىستارعا جىل سايىن جۇمىسسىز ازاماتتاردىڭ 40 پايىزى تارتىلادى. ال، جىلىنا الەۋمەتتىك قىزمەتتەر مەن جاستار پراكتيكاسى بويىنشا جۇمىس ىزدەگەندەردىڭ تەك 20 پايىزى قىمتىلادى.