العاش ءۇندىستاندا شىعىپ، تۇماندى البيوندا تاراي باستاعان "اركتۋردىڭ" جۇعۋ ءقاۋپى جوعارى - ماماندار.
بۇعان قوسا، ول انتيدەنەلەرگە وتە ءتوزىمدى بولىپ كەلەدى ەكەن. ءۇندىستاندا اركتۋردى جۇقتىرعانداردىڭ سانى 60 مىڭنان اسىپ وتىر. دەنساۋلىق ساقتاۋ سالاسىنا باسشىلىق ەتەتىن شەنەۋنىكتەر جاعدايدى ۋشىقتىرىپ الماۋ ءۇشىن ەلدىڭ كەيبىر شتاتتارىندا ماسكا تاعۋدى مىندەتتەدى، دەپ حابارلايدى Almaty-akshamy.kz 24.kz-كە سىلتەمە جاساپ.
ۆيرۋس العاش قاڭتار ايىندا انىقتالعانىمەن، الەم بويىنشا ەندى عانا كەڭىنەن تاراي باستادى. دۇنيەجۇزىلىك دەنساۋلىق ساقتاۋ ۇيىمىنداعىلار جاعدايدى ءجىتى قاداعالاپ وتىرمىز دەيدى. ۇلىبريتانيادا ازىرگە "اركتۋردى" جۇقتىرعاندار كوپ ەمەس. تۇماندى البيوندا تۇرعىنداردىڭ باسىم كوپشىلىگى كوۆيدكە قارسى ۆاكسينا سالدىرعانىنا قاراماستان، ۆيرۋسولوگتار جاعداي كۇردەلەنىپ كەتۋى مۇمكىن دەپ الاڭداۋشىلىق ءبىلدىرىپ وتىر. ويتكەنى جاڭا ۆيرۋستىڭ انتيدەنەلەرگە توزىمدىلىگى وتە جوعارى ەكەن. سوندىقتان ساراپشىلار بەتپەردە كيۋ ارتىق ەتپەيدى دەيدى.
«بريتانيالىقتار ساقتىق شارالارى تۋرالى ۇمىتقان سىڭايلى. بىزگە، شىنىمەن دە، اۋانى سۇزگىدەن وتكىزەتىن ءتيىستى ماسكالار تاعۋ كەرەك. بولمەلەردەگى اۋانىڭ ساپاسىن جاقسارتىپ، جەلدەتىپ وتىرۋ كەرەك»، - دەيدى ليدس ۋنيۆەرسيتەتەنىڭ پروفەسسورى، ۆيرۋسولوگ ستيۆەن گريففين.
تىنىس الۋدىڭ قيىنداۋى جانە جوتەل سياقتى كوۆيدتىڭ نەگىزگى بەلگىلەرى جاڭا ۆيرۋستا دا بار. ءبىراق وعان ەندى كەيبىر بالالار اراسىندا كونيۋنكتيۆيت، ياعني كوزدىڭ بىلشىقتانۋى سياقتى سيمپتومدار قوسىلىپ وتىر.
«جاڭا نۇسقانىڭ پايدا بولۋى بىزگە ۆيرۋستىڭ ءالى ەشقايدا جوعالىپ كەتپەگەنىن جانە بيولوگياسى ءالى ءتىرى ەكەنىن انىق كورسەتەدى. "اركتۋر" اعزانىڭ يممۋنولوگيالىق قورعانىسىنىڭ كەيبىر بولىكتەرىن اينالىپ وتۋگە قابىلەتتى جانە جاقىن ارادا بۇكىل الەمگە تارالۋى مۇمكىن»، - دەيدى ەكسەتەر ۋنيۆەرسيتەتىنىڭ جۇقپالى اۋرۋلار بويىنشا اعا وقىتۋشىسى بحارات پانكحانيا.
ۆيرۋس ازىرگە سينگاپۋر، اۆستراليا جانە اقش سياقتى 22 ەلدە انىقتالدى. ۇلىبريتانيادا اركتۋردى جۇقتىرعانداردىڭ سانى 50-گە جۋىق. اۋىرۋدىڭ اسقىنعانى تۋرالى ازىرگە دەرەك جوق. جاڭا شتامدى تەرەڭىنەن زەرتتەۋ عالىمدارعا قيىن بولىپ وتىر. ويتكەنى ۇلتتىق ستاتيستيكا قىزمەتى كوروناۆيرۋس تۋرالى اقپارات جيناۋدى توقتاتقان. گەنومدىق قاداعالاۋ جۇرگىزىلمەي كەلەدى. ال دەرەكتىڭ ازىدىعى عالىمداردىڭ قىراعىلىعىن ازايتادى دەيدى ماماندار.