الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ەۋروپانىڭ (بريستول جۇرەك ينستيتۋتى، ۇلىبريتانيا) جەتەكشى ينتەرۆەنسيالىق كارديولوگى دجۋليان سترەندجدىڭ قاتىسۋىمەن جۇرەك تامىرلارىنىڭ زاقىمدانۋىنىڭ كۇردەلى فورمالارى – سول جاق كورونارلىق ارتەريا ءدىڭى، جۇرەك تامىرلارىنىڭ كالسيلەنگەن زاقىمدانۋلارى بويىنشا شەبەرلىك ساباعى ءوتتى.
عزي-نىڭ رەنتگەنوپەربلوك مەڭگەرۋشىسى الەكسەي كولەسنيكوۆتىڭ ايتۋىنشا، كوروناروگرافيا جاساۋ كەزىندە پاسيەنتتەردىڭ 10-20%-ندا جۇرەك تامىرلارىنىڭ سوزىلمالى وككليۋزياسى انىقتالادى. كورونارلىق ارتەريانىڭ سوزىلمالى وككليۋزياسىندا جۇرەك بۇلشىقەتىن قانمەن قامتاماسىز ەتەتىن تامىر تولىعىمەن جابىلىپ قالادى. جۇرەك جەتكىلىكتى وتتەگىن المايدى، بۇل ءومىر ساپاسىنىڭ تومەندەۋىنە، ەنتىگۋگە اكەلەدى.
«كورونارلىق ارتەريالاردىڭ كۇردەلى جانە كالسيلەنگەن زاقىمدانۋى كورونارلىق ستەنتتەۋ كەزىندە اسقىنۋ ءقاۋپىن ارتتىرۋى مۇمكىن. سوندىقتان وڭتايلى تەحنيكا مەن قۇرالداردى تاڭداۋ بۇل پروسەدۋرانىڭ ماڭىزدى اسپەكتىسى بولىپ تابىلادى. ءبىز جاساپ جاتقان وپەراسيالار – ەڭ كۇردەلى جاعدايلار. ءبىراق ءبىز تاۋەكەلدەردى بارىنشا ازايتا وتىرىپ، پاسيەنت ءۇشىن مۇنداي ارالاسۋلاردى مۇمكىندىگىنشە ءقاۋىپسىز جۇرگىزۋدى ۇيرەندىك. وسى ورايدا قازاقستاندىق دارىگەرلەردىڭ جوعارى دەڭگەيى مەن تاجىريبەسىن اتاپ وتكىم كەلەدى»، – دەيدى دجۋليان سترەندج.
سوزىلمالى جالپى وككليۋزيالار مەن كورونارلىق ارتەريالاردىڭ كالسيلەنگەن زاقىمدانۋلارىن ەمدەۋدەگى جاڭا تەندەنسيالار تۋرالى دەمونستراسيالىق وپەراسيالار مەن تەوريالىق ساباقتاردى وتكىزۋمەن تاجىريبە الماسۋ ماماندارعا جاڭا جابدىقتا جۇمىس ىستەۋدى ۇيرەنۋگە، كاسىبي قىزمەتتە قاجەتتى داعدىلاردى جەتىلدىرۋگە مۇمكىندىك بەرەدى.
سونىمەن قاتار، كلينيكانىڭ رەنتگەنحيرۋرگتارى اورتا قاقپاقشاسىنىڭ اۋىر ستەنوزىمەن 90 جاستاعى ناۋقاسقا TAVI (قولقا قاقپاقشاسىن ەندوۆاسكۋليارلىق اۋىستىرۋ) وپەراسياسىن جاسادى. مۇنداي ناۋقاستارعا قولقا قاقپاعىن اۋىستىرۋ ءۇشىن كارديوحيرۋرگيالىق وپەراسيالار جاساۋعا بولمايدى، ويتكەنى ولاردىڭ كەنەتتەن قايتىس بولۋ ءقاۋپى جوعارى. TAVI – قولقا قاقپاعىن جاساندى بيولوگيالىق كلاپانمەن اۋىستىرۋدىڭ زاماناۋي، از ءينۆازيۆتى ءادىسى. وپەراسيادان كەيىن ناۋقاس ءوزىن جاقسى سەزىنەدى. بارلىق كورسەتكىش قالىپتى شەكتە، وتادان كەيىنگى اسقىنۋلار بولعان جوق.
مارات پاشيموۆ، كارديولوگيا جانە ىشكى اۋرۋلار عزي-نىڭ باسقارما ءتوراعاسى:
– بۇل شەبەرلىك ساباعى سونى ۇلگىدەگى ROTA PRO جۇرەك تامىرلارىن روتابلاسيالاۋ جۇيەسىن پايدالانا وتىرىپ وتكىزىلدى. اتالعان جۇيە ەلىمىزدە العاش رەت قولدانىلۋدا. بۇل بىزگە ەڭ كۇردەلى پاتولوگيالارى بار ناۋقاستاردى ەمدەۋگە كومەكتەسەدى. كورونارلىق ارتەريالاردىڭ كالسيلەنگەن زاقىمدانۋلارى جانە سوزىلمالى جالپى وككليۋزيالارى بار پاسيەنتتەرگە تەرى ارقىلى كورونارلىق ارالاسۋلار جۇرگىزىلدى. شەبەرلىك ساباعىنا الماتى قالاسىنىڭ ينتەرۆەنسيالىق كارديولوگتارى قاتىستى. ءسويتىپ مەگاپوليس دارىگەرلەرى كاسىبي جانە كلينيكالىق تاجىريبە الماسۋعا مۇمكىندىك الدى. بۇل ءبىز ءۇشىن ۇلكەن جەتىستىك.